Ua atoa vaiaso o faalele e le aufaasalalau ma tagata tuai o le Wallabies le avea o la latou au o se Siamupini mautinoa i le Ipu o le lalolagi o faagasolo nei aemaise lava i le uma o ana taaloga ma Wales ma Egelani. O le po o le Aso Sa na semanu e sola ai na mau miti i le faiga e Sikotilani o osofaiga ma avanoa maua e ono manumalo ai. E toe lua minute o totoe o le taaloga o sili pea Sikotilani ia Ausetalia 34-32 i le sailiga o le ‘au e sao atu i le Semifinal.
O se taaloga na manu‘a ai foi le alo iloga o Samoa ia Scott Sio le poutu o le sikalamu a Ausetalia lea sa faigata la latou tauiviga ma le laina i luma a Sikotilani. O le uigi ia Adam Ashley Cooper na sikoa muamua mo Ausetalia i se osofaiga na amata e Kuridrani ae tali mai Peter Horne i se sikoa mo Sikotilani i lalo o le pou lea e maofa i le maulu atu ma sao ai lava. Na tuli i tua mo le sefulu minute Sean Maitland o Sikotilani ae sao atu loa Drew Mitchell mo lana sikoa muamua ta le ‘afa o sili Sikotilani 16-15.
I le amataga o le ‘afa mulimuli na molo ma savavali atu Ausetalia i le laina ma pasi atu ai loa e Will Genia le polo mo le sikoa lona lua a Drew Mitchell mo ‘ai 25-19. Na tali Sikotilani i le minute 58 i se kiki na poloka ma sikoa ai le uigi a Sikotilani ia Seymour ma pipii ‘ai 25-24.
E lei nofoai Ausetalia ma faatini ai e Tevita Kuridrani se sikoa na aumaulu atu ai mo le laina sikoa tulai le sikoa e 32-24. Pe toe fitu minute o totoe ae ua faateia loa Ausetalia sa sili e 32-27 ina ua faasalavei ai e Mark Bennett se pasi a le pou a Ausetalia ia James Slipper i luga o le laina luasefululua ma sikoa ai Mark Bennett mo ‘ai Sikotilani 34-32 Wallabies.
O le taimi lea na galo uma ai miti sa manatu ma momoo i ai le Wallaby i le toe malosi mai o Sikotilani ma e tusa toe lua minute o totoe ae faasala loa e le laufali Sikotilani i se polo na toe fiti i luma ae sapo mai e le latou sui ma ‘offside’ ai. Na fai si mamao faaautafa o lea sala ae na to‘a ma agavaa Bernard Foley lea na ova lenei faaolatotoga mo Ausetalia ma manumalo laki ai e 35-34 a Sikotilani.
Na lē toe vaaia foliga ataata o le faiaoga ia Michael Cheika ae na fesiligia i le sala na talitonu nisi sa lē tatau na tuuina atu i lana ‘au talu ai o se sikalamu sa tatau ona faatino e lē o se sala. Na tali Cheika, “E ui o se sala ae na talitali pe ova le kiki a Bernard Foley.” Ana fapea la e misi le kiki a Foley e faapenei ua tapena ato a Ausetalia mo le taliu mai i fanua.
Ua sauni atu nei Ausetalia e fetaiai ma le ‘au malosi a Argentina i le Semifinal lona lua. Mo Scott Sio o loo tapena e fomai togafitiga i lona tulilima faatasi ma David Pocock aemaise Israel Folau ia manuia nei manu‘aga ma taaalo uma i le vaiaso nei.
