E faalua ona ta le vii o Samoa i taaloga ale Commonwealth, ile Aso Gafua 6 o Aperila, ina ua faamanuiaina Sanele Mao ma Feagaiga Stowers i pine auro ile taaloga ole siisii uamea mamafa.
Ose faaeaga mo Samoa aemaise le tautiga ole aliifaiaoga le afioga ia Tuaopepe Jerry Wallwork, ile tapenaga ole ausiisii a Samoa. O Sanele Mao ua 32 tausaga o lona soifua, na tauva ile vaega o alii 105kg, na ia ausia le 360kg ile tuufaatasiga o ana sii na ia maua ai le auro.
Ose alii e lē tele ni tala e tautala ai, e pau lana upu ina ua fesiliga e tusa ai o lona manumalo na ia saunoa ai, “Ua ou fiafia ua ou maua le pine auro mo la’u ‘au faapea si o’u atunuu.”
Ole auro lona lua a Samoa na maua e le tamaitai talavou 17 tausaga o Feagaiga Stowers, na tauva ile vaega 95kg ma ia ausia ai le 253kg, ile tuufaatasiga o ana sii mo le pine auro.
Ole avanoa o Feagaiga ile auro na maua ina ua faamaamulu le faafafine Niu Sila lea na tauva ile vaega a tamaitai, o Laurel Hubbard, ina ua aafia i manu’aga. “Na faate’ia a’u ina ua faamaamulu ese Hubbard mai le tauva, na ou lagona ai, ua iai le avanoa oute malo ai ile pine auro.”
O isi pine a Samoa o pine siliva, na maua lea e Don Opeloge ma Lauitiiti Lui ma ua tulai mai ai pine a Samoa ile lua ai pine auro lua pine siliva i taaloga oloo faagasolo nei i Gold Coast i Ausetalia.
Weightlifting
A’o tapena le lomiga ale Samoa Times mo lenei vaiaso ae ua maua le tala fiafia ile Pine Auro a Sanele Mao na maua ile 105kg. O lana sii na sili atu ile sii a Pardeep Singh o Initia ma Owen Boxall o Egelani. Ole auro muamua lea a Samoa i Gold Coast.
Ole isi Pine a Samoa ole Pine Siliva ale alii talavou o Don Opeloge ile mamafa 85 kg. Ae ana manuia lana sii mulimuli ile mamafa e 191kg semanu ole Pine Auro e maua e Opeloge mo Samoa.
Na manuia lana sii ile Snatch 151kg le mamafa ae lei sao lana sii ile 188kg ma le 191kg ile Clean and Jerk. E 331kg le aofai o lana sii, e fitu kilokalama e maualalo ai mai le sii a Venkat Rahul Ragala o Initia.
Na ta’ua e Don lona fiafia tele i lana Pine siliva, ae faanoanoa e lei maua e ia ole Pine Auro. E tele lesona ua maua e Don Opeloge mo le lumanai. Na lelei le sii mama (clean) ae faaletonu lana taumafai mo le 191kg. I lana taumafaiga lona lua na faapea Opeloge ua sao lana sii mo le Pine Auro, ae e lei ioe iai faamasino e toalua ona e pio laititi lona lima a’o i luga lana sii. Ole ala lea na malo ai le Initia.
E ui e lei maua le Pine Auro, ae ua amata ona moemiti Opeloge mo le isi taaloga ole Commonwealth Games ile 2022. I isi tauvaga na misi ai pine, o Vaipava Ioane ile 69kg a alii. Na mae’a ana taumafaiga ile tulaga #4. E 3 kilokalama na va ai o ia ma le tulaga #3. E lei manuia taumafaiga a Siaosi Leuo ile tauvaga ale Men’s 94kg – e lei ausia e ia sii faaiu ole tauvaga.
Faitio Tuaopepe Asiata ile tauva o Laurel Hubbard ile siisii a Tamaitai
Ua lē natia le le fiafia o Tuaopepe Asiata Jerry Wallwork ile tauva ai ole tamaitai o Laurel Hubbard ile 90kg a tamaitai. Ua fesiligia ai o ia e le ABC a Ausetalia i lea mataupu ma faaalia ai sona manatu ile lē fetaui ole tauva ole tamaloa ma tamaitai, auā o Hubbard na siamupini ile siisiiga a alii, ae o lea ua tauva ma tamaitai ina ua mae’a ona liliu lona tulaga mai le alii ile teine. Ole mau tauave lava lea a Asiata, e lē fea le auai o Hubbard ile taamilosaga a tamaitai.
Matati’a Fou mo Samoa Swimming
Na tauva le tamaitai o Lushavel Strickland ile 50m ma le 100m backstroke. E tu 7 ile 50m ae tu valu ile 100m ile Heats. Na lelei lana 100m freestyle, na ausia ai e ia le semi final (race 3) ma le taimi fou 59 sekone 01. Ole matati’a fou lea mo Samoa ile mamao lea.
Alana Suttie ile 400m Medley na iu lana taumafai ile Medley ile tulaga 12 ile taimi 5 mins 23 sekone. Ole aso Gafua e tauvai ai o ia ile Butterfly 200m.
Ole alii o Brandon Schuster na tauva ile 400m freestyle. Na amata ile tulaga 14 ae uma ane ua maua e ia le tulaga #12. O lana taimi e 4:03:50 e sili atu lea ile 4:17:27 na ia ausia i taaloga ale Oceania. Na tauva foi Schuster ile Inidividual 400m Medley na maua ai e ia le taimi 4minute 31sec. E lei au ile final ole taamilosaga lea. ile 100m freestyle o Schuster na mua i lana Heat ile taimi 51.95 mo le 100m.
Polokalame ole Vaiaso
Ole vaiaso mulimuli lenei ole Commonwealth Games, e faauma ile Aso Sa taaloga. Ole Aso Gafua na fai ai tauvaga ole Siisii mea mamafa ole 90kg ma le 105kg.
5-14 Aperila: Boxing – fa sui ole Samoa Boxing oloo tauva – Valentin Kondakov 64kg; Henry Tyrell 75kg; Ato Plodzicki-Faoagalii 81kg; Frank Masoe 91kg
10-13 Aperila: Lawn Bowls
10-14 Aperila: Shooting e fa sui a Samoa oloo tauva, Fata Paul Loibl; Sigried Levi; Francis Cafarrelli Men’s double trap; Ioane Galuvao Men’s double trap
9-15 Aperila: Amata Afeleti oloo tauva ai sui e 6 ale Samoa Athletics
10 Aperila: Swimming, faauma ai polokalame ale Swimming
14 Aperila: Samoa Sevens vs Australia; England; Jamaica Pool Games
