Darren Young na mua i Mulinuu -  Saoasaoa le uila a le alii o Wally Collins -  O le tamaitai o Katie Riley na mua i tuuga a tamaitai

Darren Young na mua i Mulinuu – Saoasaoa le uila a le alii o Wally Collins – O le tamaitai o Katie Riley na mua i tuuga a tamaitai

O le Aso Toonai na faatino ai le tuuga lona 3 o le tausaga a le Samoa Triathlon Federation i Apia. O le alii o Darren Young, 47 tausaga na sola ma le manumalo o le tuuga autu. Na tu lua Gideon Mulitalo, 15 tausaga ae tu tolu Kantaro Oishi, 44 tausaga mai Iapani.

O loo tapena le Federation a Samoa e talimalo i le Pacific Islands Championships i le masina o Tesema. E auai atu motu uma o le Pasefika i lea faamoemoe e iai Fiti, Papua Niu Kini, Vanuatu, Solomona, Guam, Cook Islands, Tonga ma Amerika Samoa. O se taimi muamua foi lenei o le a talimalo ai Samoa i le taaloga tuufaatasi a le Oceania.

I le tuuga o le Aso Toonai i ona vaega e tolu o le aau, uila ma le tamo’e, o Gideon Mulitalo na mua i le aau, e 24 minute i le mamao e 1.5km. O Wally Collins na mua i le uila, e 35 minute mo le 20 km, ae mua Darren Young i le tamo’e e 24 minute mo le 5 km. Ae o le tuufaatasiga e sili ai le taimi a Darren mo vae uma e tolu o le taaloga.

O le au aau na muamua i le tuuga lona tolu

O le au aau na muamua i le tuuga lona tolu

E matautia le tulaga ua oo iai le taumafai a Gideon Mulitalo. Na amata taalo o ia i le triathlon mai le 9 o ona tausaga i le taimi na amata ai le taaloga i Samoa i le 2013. Ae o lea ua tauva ma tagata maualuluga o le taaloga e iai Darren ma Kantaro. I le tuuga lona lua o le tausaga i le masina o Mati o Gideon na mua ai i le tuuga lea. O le faasologa lea o le lelei ua oo iai lona taumafai.

O le tolu ai lenei o tausaga ma tauvaga ua auai mai iai Oishi mai Iapani. Na muamua taalo i Samoa i le 2013 i le Warrior Race, toe tauva i le 2015 ae o lea ua toe tauva i le tuuga pupuu. Ua faaaogā ai e Oishi ma Darren le tuuga i le Aso Toonai e tapena ai mo tuuga mamao o le masina fou. O Oishi e malaga i Cairns mo le tuuga a le Ironman i Ausetalia i Matu a’o Darren e tauva i le Ironman i Santa Rose e fai foi i le masina fou.  Ae o le faamoemoe a Samoa e talimalo ai i atu motu o le Pasefika o le a faaaogā ai le tuuga pupuu e pei ona fai i le Aso Toonai. O le tuuga lea ua ta’ua o le Sprint Distance, 750m le aau, 20km le uila ae 5km le tamo’e. E to’alima le ‘au a Samoa o loo tapena mo lea faamoemoe, e iai Durant Webster, 14 tausaga, Shane Taivai Paulo, 24 tausaga, Darren Young, Gideon Mulitalo ma le sui e tasi e faaopoopo o le a faaopoopo iai.