“Auā o le faamoemoe ua taunuu o le laau o le soifua lea.” O le muagagana masani lea e faaaogāina e le tele o failauga ia latou saunoaga i le taimi e faafeiloaia ai se au valaaulia ma faamātafi ai ao o le lagi i se faamoemoe sa fauao faupo, e pei foi la o le mafutaga matagofie na faataunuuina i le afiafi o le Aso Toonai, 15 Novema i le faletalimalo o le Pullman i le taulaga o Aukilani. O le fofoga o le po sa nafa ma le Susuga Aiiloilo Dr. Elise Puni.
O le autu o lenei afiafi matagofie, o le faamanatuina o le atoaga o le 100 tausaga ma lona agai atu i le 150tausaga o le folauga na pulea ai e le malo o Siamani ma faaauau mai ai e Niu Sila Samoa, ae o se toe faamanatu foi e fafaguina ai pea i lagona ma manatu o o tatou tagata, le tāua o le mafanafana o le faigauo mamae a le malo o Niu Sila ma le malo o Samoa ua iai nei, e ui lava ina molimauina le afatia ma le lutia i puava o nai o tatou tuaa ona o tiga ma faigata sa feagai ma i latou i lea vaitau.
Pei foi ona sa saunoa se tasi o sui taitai o le Samoan Community le Tofa Pa‘u Teleiai Puni ma na ta‘ua ai le tiga ma le oona o tulaga na oo i ai tuaa i ia vaitau, ae o se fesootaiga ma se faauoga ua mafanafana ma ua mafai ai ona faatāua ma amanaia manaoga, o faasinomaga, o tupuaga, o le gagana aemaise o le ogatasi o nisi fuafuaga ma tofa mamao auā lava se manuia o tupulaga fai a‘e o Samoa i Aotearoa nei ma Samoa foi.
Ua faamaonia ai pea le muagagana, “Se mea ina a lelei o uso e nonofo faatasi, fegalegaleai ma soifua fealofani.” O nisi ia o lagona na fofola mai e ala i saunoaga faapitoa na saunoa i ai sui filifilia o le faamoemoe, na momoli mai ai faatasi ma le faamalo ma le faaeaea pea i tuaa ua mavae atu na latou asa maia le gasū o le vao filifili auā lava se ‘ai mo Samoa ina ia maua le saolotoga, saogalemu aemaise ia maua e tagata Samoa le soifua manuia.
O saunoaga faapitoa o lea po o le afioga i le Minisita o Tagata Atumotu o le Pasefika i Niu Sila nei, Hon. Peseta Sam Lotu-Iiga na saunoa e fai ma sui o le malo o Niu Sila, ae o le afioga i le Konesula Aoao o Samoa i Aukilani, Afioga His Excellency Faolotoi Reupena Pogi sa saunoa e fai ma sui o le malo o Samoa.
Sa faatinoina foi le ‘ava o le feiloaiga na faafeiloai aloaia ai sui mamalu o le malo o Niu Sila sa auai aemaise foi o le Susuga Ulli Weissbach sa fai ma sui mai le malo o Siamani.
Matagofie ma maualuga lenei faamoemoe tāua e manatua ai ma patipatia ai le folauga a Samoa ma ona tagata i lana sailigamalo mo se manuia, aemaise o le nopiai ai i Aotearoa nei ma isi atunuu mamao, ona o le toatele o sui mai matagaluega eseese e aofia ai ma faauluuluga o pisinisi o tagata Samoa i le atunuu, o taitai o Ekalesia eseese ma tagata lautele aemaise o le paia ma le mamalu o le atunuu i tupu ma tamalii, o pulatoa o le atunuu faapena foi i alii ma tamaitai sa mafai ona auai atu e molimauina le tāua o lenei faamoemoe.
Na saunoa le Tofa Pa‘u Teleiai Edwin Puni, e faafetaia le taupati mai e tusa ma le talileleia o le faatalauula atu, aemaise o le amanaiaina o le valaau atu ina ia auai mai e faatāua lenei matatia ma lenei laasaga o le talaaga o le soifuaga ma mea na tutupu i totonu o le malo o Samoa i le 100 tausaga ua tuanai atu, aemaise foi o le malaga agai atu i le lumanai ma ona taualumaga.
