SAMOA AIRWAYS – Tulaueleele i Aukilani le vaalele fou a Samoa

Ole taeao nei Aso Lua, 14 Novema, ile itula e 10.15 ile taeao ole a tulaueleele ai ile malaevaalele i Aukilani mo le taimi muamua le vaalele a Samoa, le Samoa Airways.

Ole a faafeiloai ele pulega ole malaevaalele i Aukilani le taunuu mai ole vaalele fou a Samoa.  E lua loli fuimu ole a faaituala lua, ae fana le vaalele i vai, e tusa ai o tu ma aga masani e faafeiloai ai se vaalele fou, a’o lei agai mai ile nofoaga ole a taunuu mai iai ma faatino ai le faafeiloaiga faa-Maori le powhiri.

Oloo malaga mai ai ile vaalele le afioga ile alii Palemia, Susuga Tuilaepa Sailele Malielegaoi, faapea le Minisita ole Samoa Airways, Afioga Lautasi Selafi Purcell, ole Minisita o Tupe, Afioga Sili Epa Tuioti ma le Minisita o Fela’uaiga, Susuga Papaliitele  Niko Lee Hang, ma le Loia Sili, Afioga Lemalu Herman Retzlaff.

Nisi ole auvaa ale Samoa Airways
Nisi ole auvaa ale Samoa Airways

O i latou nei ua avea ma sui o Samoa e faafeao maia le malaga muamua ale Samoa Airways i Aukilani.

Ile faatali atu a Aukilani, ua avea ai ma sui ole malo Niu Sila le tamaitai Minisita, ia Carmel Sepuloni, faapea le pulenuu o Aukilani, Afioga Lilomaiava Phil Goff ma le Pule Sili ole Malaevaalele o Aukilani, ia Adrian Littlewood.

Ole taunuu mai ole vaalele fou ole a maua ai le avanoa ole aufaasalalau e faatalanoa ai le afioga ile Palemia faapea le Minisita ole Samoa Airways, ma tatala foi le avanoa latou te maimoaina ai le vaalele fou a Samoa.

Ole itula e 6pm ile afiafi ole Aso Lua lava ole a faataunuuina ai se sauniga e sami ai le amataina aloaia ole tautua ale Samoa Airways ile Maota o Samoa i Magele.

E toatele le mamalu ole atunuu ua valaaulia mo lea faamoemoe.  Ole ituaiga vaalele ole Boeing 737-800 na lisi mai ile Iceland Air, ua amata ai galuega ale Samoa Airways, ae ole faamoemoe ole Malo, ole a aumai se isi vaalele lapoa le ituaiga ole Boeing 777 e faalautele ai le tautua ale Samoa Airways ile isi lua tausaga o lumanai.

E ono masina oloo galulue ai le auvaa faapea le aufaigaluega ale Iceland Air faatasi ma le aufaigaluega ale Samoa Airways, faatoa tuulima mai lea ole galuega e faafoe ele Samoa Airways.  Ia tatou talosia le fala see mai ole vaalele ole atunuu, ina ia folau ma le saogalemu i peau ole ea, ma ia manuia lona faatautaiga.