Sami ipu a le Autalavou EFKS Glenfield

E leai se faamoemoega e aunoa ma sona patipatia pe a oo ina taunuu ma le manuia sona taunuuga.
O lea taunuuga manuia e mafua ai ona augofie le loto e fai se sauniga lelei e saga faafetaia ai le Atua ma Lona alofa, ona o le lasi o ana faamanuiaga sasaa mai ua mafua ai ona tua pea i manu le alofaiva ma tapenga aua soo se faamoemoega.
A oo la ina patipatia, ona olioli lea o le agaga aua ua siitia le viiga e tatau i le Atua, ae ua faafetaia foi le tautiga na mafua ai ona faamanuiaina taumafaiga.
O le ata lea ma se lagona na molimauina e le Tusitala i le Aso Toonai na sei mavae atu nei, a o alo le susuga i le faafeagaiga ia Rev Iosefa Rimoni ma lona faletua ia Lagi, ae le gata i lea o le mamalu o le Ekalesia EFKS i Glenfield mo le tuufaatasia o le aso faapitoa mo le Autalavou, aua le samiina o a latou ipu na manumalo ai i taaloga a le Pulega Waitemata i le tausaga na sei mavae atu nei.
O lenei faamoemoe na matua lava tapena i le maitau atu a le Tusitala aua se faamoemoe foi ina a saunia lelei ma le mataina i ona itu uma. Na amata mai lava i le sauniga lotu sa taitaia e le susuga i le Tama Faifeau, Rev Iosefa Rimoni, ona sosoo ai loa lea ma le polokalame o le aso.
Na leai se isi na toe pisa i le taimi na sagai ane ai le Autalavou i le latou pese faaleaganuu lea sa fai ma aao faatalofa e faafeiloaia ai le mamalu i le auvalaaulia, le nofo a faafeagaiga aemaise ai o le Tama o le Pulega, le susuga i le Toeaina Faatonu, Rev Ioritana Tanielu ma le paia maualuga i tupu ma tamalii sa faapea ona auai atu e fai ma molimau o le faamoemoe.
E leai se vaega na lei oo i ai viiviiga o le pese faafeiloai ma ua pei ai lava o loo toe faalogologo i Samoa i taimi e fetaaloloai ai le atunuu i ona aso faailogaina i le malie ma le matagofie o le pese sa lagiina i le amataga o le polokalame.
O le afioga i le Peresitene o le Autalavou le susuga ia Timata Tusa Semi o ia lea sa tusiaina lenei pese, ae o lona faletua le tina ia Ina Tusa o ia lea sa fai ma fuataimi, ma o se tagata lava foi ina a mataina ma onomea i le matafaioi o le fuataimi.
Na maea lea ona alo lea o le autalavaou ia latou faafiafiaga o siva ma vaega uma sa tapena ma tuufaatasia aua le faamatagofieina atili o le latou faamoemoe e ala lea i le latou samigaipu.
O le Autalavou lenei mai le Ekalesia EFKS Glenfield sa tele ni vaega sa manumalo ai ina ua uma ma maea le taamilosaga o taaloga a le Pulega sa faataunuuina i le faaiuga o le tausaga na sei mave atu.
O le faiga lava lea na masani ai le Ekalesia, a oo loa o le a sauni e amata le taamilosaga i lea tausaga ma lea tausaga, ona faatoa sami foi lea o ipu na manumalo ai i tausaga ua tuanai.
E fitu ipu sa manumalo ai le Autalavou i taaloga a le Pulega i le 2008, ma e aofia ai i nei ipu le manumalo o le olo silia i au a tamaitai, o se tasi o ipu ua ono nei tausaga o tumau pea ia Glenfield ma e lei mamulu ese atu lava.
O loo aofia ai foi ma le ipu i le aukirikiti a alii, ma o le ipu lea e fitu lelei lava tausaga o loo umia lea e le Autalavou a le Ekalesia Kigiselani, lea o loo faifeau ai le susuga i le faafeagaiga ia Rev Maligi Evile.
E le gata la i ipu, ae sa samiina ai foi ma le talita o le manumalo aoao, ia pe o le Autalavou ua manumalo i le tuufaatasiga o ai i taaloga taitasi e pei o le kirikiti, voli ma isi lava mau taaloga sa faataunuuina.
O lenei talita ua umia fou e le Autalavou EFKS Glenfiled.
I le saunoaga a le afioga i le peresitene ina ua feiloai ma le Tusitala, na ia taua ai o le viiga lava ma le faafetai e foi pea lea i le Atua, aua ana le seanoa Lona alofa e le tua i manu le faamoemoe a le Autalavou.
Na ia faafetaia foi le susuga i le latou Tama Faifeau ia Rev Iosefa Rimoni ma lona faletua ia Lagi, ae le gata i lea o le paia maualua i le latou autalavou atoa ona o le agaga o le tausinio ma le taumafai sa faapea ona tauva ai i taaloga, aua ana leai le finau lea pe o penei e le tau foi lau o le faamanuia mai o le Atua i le taaloga sa feagai ai.
I le finagalo lava a le afioga i le peresitene, le Susuga ia Timata Tusa Semi, e moni lava foi o ipu ma le talita ua latou umiaina, ae o le faamuamua lava e ave lea i avanoa lelei e mafuta ai ma isi uso a autalavou i totonu o le pulega.
O le agaga maualuga lea o loo tulitulimatai pea i lea tausaga ma lea tausaga, ina ia saga faatumauina ai le sini autu ma le mau tauave a le Autalavou uma a le Ekalesia Faapotopotoga Kerisiano Samoa, e ala lea i le Ola ia Keriso.
O le taimi nei o lea ua toe nofo sauni le Autalavou EFKS Glenfield mo le puipuia o a latou ipu aemaise ai o le talita e ala i taaloga o le a alo atu ai foi le Pulega Waitemata i lenei foi tausaga, ma o le a faataunuuina i le masina fou.