Malo fai o le faiva! Malo le faatoatoa! O le aso 9 o Fepuari 2013 sa faatino ai le samaina o le tatau poo le pe‘a a le alii o Tafa Aii, a o maimoa ma le agaga fiafia ma le loto faafetai ona aiga, uo ma ē masani sa auai.
O le susuga Tafa Aii e mai alalafaga o Falevao, Falelatai faapea Samatau & Vaovai Falealili. O se tasi o alo faasino ia Upuolevavau Aii Fanaea Ulutoa Aii & Faamalu Aii, ae o ia le uluai alo tama mai le to‘a 8 o tama, ua tofo i le ma‘ini o le au, ma ua tau ai lau o le faamoemoe sa fau ao fau po.
O le afioga ia Tuifaasisina Fuga sa feagai ma le taina o le tatau a le susuga ia Tafa.
O se mitamitaga foi lea ia Tafa ina ua mae‘a lana tatau, ma ua laei ai nei i le measina a lona atunuu. E 3 masina sa faia ai le galuega mae‘ae‘a a le tufuga ta tatau.
