O le agaga faafetai i le Atua a mātua, aiga, aemaise o fanau ona ua faataunuuina ma le manuia tatau na alo atu i ai nisi o tamā o le aiga. E ui ina tiga ae ua iu ma le fiafia ma le manuia ae sili ai le viiga o le Atua.
O le sini foi lea ma le autu na iai le sauniga lotu faapitoa i le afiafi o le Aso Faraile ua tea nei 26 o Setema i le maota o le susuga ia Tusa Pasui i Otara, o le patipatia o le taina o tatau a nei tamalii o le atunuu.
O aiga, uo ma fanau sa auai i lenei sauniga faapitoa. O upu faamanuia ma le samaina o tatau na nafa ma le agaiotupu le susuga ia Tulouena Faaofonuu Moemoe Pio Faamausili faapea le falefa o le aiga Salemalama. Na sosoo ma fiafia ma faaiu ai i le taumafataga na saunia lava e aiga.
O le tauaaoina o meaalofa ma faaaloaloga na saunoa i ai le susuga ia Kolio Tanu ma le la agaga faafetai i le agaiotupu ona ua mafai ona la laeiina lenei laei o le atunuu. E 2 vaiaso na taoooto ai nei alii ma samaina ai loa a laua pe‘a i le Aso Faraile.
O le agaiotupu ia Tulouena Faaofonuu Moemoe o loo alala i Samoa i le afioaga o Lufilufi, o le ala o lona asia o laufanua o Aotearoa, o le meaalofa a le susuga ia Tusa Pasui e malaga mai e tafao ona o le la faigauo ma le taina o lana tatau a o iai i Samoa, ma o le mafuaaga foi lena ua maua ai ma le avanoa e ta ai ma tatau a le susuga ia Toesulusulu Peniamina ma Kolio Tanu.
O lana uluai galuega foi lea i totonu o Niu Sila nei, ae o loo iai foi ma le faamoemoe i nisi o tamalii o le atunuu ua faatoai atu a latou tatau a o lei toe taliu atu le faigamalaga i Samoa.
Ae na fesiligia e le tusitala nei tamalii, o le ā le mafuaaga ua lua fia laei ai i le pea Samoa? (1) o le tautua e tatau ona iai sana pe‘a e tautua ai le fale o matai, (2) e tatau lava i se tamalii Samoa ona laei i measina a le atunuu.
