O le faamoemoe mo lagimalofie a le Afioga ia Muagututia ma le Afioga ia Toleafoa na faataunuuina i le Aso Sa 13 o Mati i le itula e 4 i le afiafi, na taunuu ai le Susuga i le Agaiotupu ma le Meana‘itāua faapea le autufuga i laufanua o Brisbane.
O le Agaiotupu o le Fetalaiga ia Faitagatau Togia Uiese Lauvao mai le alalafaga o Falefa ma Fagaloa. O lona tausi o Faafou Shallotte Lauvao, o se alo e faasino ia Tuimaseve Faresa ma Salote Seumanutafa, ma o loo alala i Canberra.
O le aveeseina mai o le Atoau mai Vaiana le maota e susū ai Su‘a ma lou falelua e lē faigofie, ae o se tofa faatupu ma faatamalii o le Susuga i le Agaiotupu lea na molimoli atu ai i Faletasi ma Vaia‘ua‘u lana ato Au, auā le faamoemoe o le fanau.
O le Afioga ia Tualatamalelagi le fetalaiga ia Pasese Lemalie Tuala, o le tafai lava lea o le Tui Aana. O le fofoga foi lea o le Matuanatogi ma le Faleiva, o le tootoo Maauga ma le mamalu i le Fale Aana.
O le afioga ia Tuifaana‘e le afio o le aiga Satuala ma le Fetalaiga ia Le‘autuli‘ilagi M.S. Vaatausili Tualatamalelagi Leapai ma le mamalu o le aumalaga, na molimoliina atu le Agaiotupu ma le autufuga ma le Atoau i laufanua o Brisbane.
Ina ua taunuu sa alo loa i le ‘ava o le feiloaiga, Usu faaaloalo foi le Fale Aana. O le Fetalaiga ia Tapuala Taumaloto Faalelei na fetalai auā foi le taunuu i fanua o le Agaiotupu ma le Atoau, ae o le fetalaiga ia Leautuli‘ilagi Vaatausili Leapai na folafolaina ‘ava o le usu faaaloalo.
O le fetalaiga lava i le Tafa‘i o le Tui Aana o Pasese Lemalie Tuala na tali faitau i le mamalu o le Fale Aana, ona alo loa lea i le taligasua.
O le taeao na sosoo ai na fai ai se talosaga puupuu e le susuga i le Faafeagaiga ia Rev Anamani ma le Faletua ia Tagiilima Logo, ona amata loa lea o le galuega a le Agaiotupu.
O le Aso Gafua 21 Mati i le 7.00 i le afiafi na faamae‘a ai le galuega ma sosoo ai lava ma le samaina o Malofie.
O tulaga masani lava i aso faapenei sa amata lava i le sauniga lotu saunia e le Susuga i Faafeagaiga Rev Anamani Logo ma Pastor Aleti Kurene.
Sosoo ma le samaina o tatau, ina ua mae‘a sa alo loa i le agatonu o le ‘ava e faamavae atu ai ma le Agaiotupu ma le Meana‘itāua, aemaise le toe molimoli atu o le ato Au i Vaiana.
O le Tofa ia Vaili le Fetalaiga ia Tavaa Tevita Sione na alagaina le agatonu a o Chanel Schmidt na solisoliina le alofi.
Sosoo ma faaaloaloga masani i aso faapenei, o le Tofa lava ia Tapuala Taumaloto Faalelei na feagai ma faaaloaloga, ae o le Tofa ia Taloolemaagao le Fetalaiga ia Vaeila Nofoituaiga Povalu Filipo Luafutu na fai ma fofoga taumomoli o le Agaiotupu ma le Meana‘itāua faapea le auvalaaulia, tainane le Usoga mamalu a Tumua ma Pule. Na mae‘a ona sosoo loa lea ma le taumafataga.
O le sogaimiti muamua o Valentine Scanlon, o se alo e faasino ia Martin & Amanda Parker Scanlon a o lana manamea o Ane Laylan Pela Faalelei Scanlon.
O le sogaimiti lona lua o le Fetalaiga Solialofi Gary Taumaloto Faalelei, o se alo e faasino ia Tapuala Taumaloto & Laupua Metotisi Faalelei, a o lana manamea o Aymee Connolly.
