Ua faasala tupe e le faamasinoga se tamā 56 tausaga e nofomau i Ausetalia ae na malaga mai i Samoa i le masina o Tesema ae toe o nai aso oo i le Kerisimasi.
O Lui Pesamino na molia i le faaoolima i se tina sa la nonofo faatasi mai i le malaga a le vaalele o le Virgin Samoa mai Ausetalia i le aso 23 o Tesema.
O faamaumauga a leoleo na folasia i le faamasinoga na ta‘ua ai sa faia e lē ua molia le faaoolima a o tofa le tina talavou a o alu le faigamalaga a le vaa.
O faamaumauga lava a leoleo o loo faaalia ai, sa milimili e lē ua molia se vaega o le tino o lē na tagi e pei o lona fatafata ma lona manava a o moe.
O se gaioiga na toatamai ai le tina talavou ma na ia faaoo lona lē fiafia i le fesootai sa‘o i leoleo i le ofisa i Faleolo ina ua taunuu le malaga a le vaalele, ma faia ai loa le moliaga o Lui Pesamino. Na faaalia e le tamā na molia, e lē masani i lē na tagi ma na te lei faia foi i ai se gaioiga faapea.
Peitai sa ia faailoa i le faamasinoga na mafua ona ia ioeina le moliaga ona ua toe fia foi i Ausetalia. Na faailoa i ai e le faamasino na tauaveina le mataupu ua laki ua molia ile faaoolima ae lē o le faaoolima matagā auā e ogaoga ma matuia le solitulafono na ia faia.
E 400 tala le salatupe mo lē ua molia ma sa tatau ona uma le Aso Gafua na tea nei, 28 o Ianuari 2013 ua totogi, a leai ua falepuipui mo le umi e 3 masina. Na faamaonia mai e se alii ofisa o le faamasinoga ua mae‘a ona totogi le sala tupe, ma ua toe faamatuu pepa malaga o lē na molia ina ia mafai ona tuua le atunuu.
O le tina na tagi e faamautu foi i Ausetalia ma lona aiga ae na malaga i Samoa mo nisi o fuafuaga ma asiasi i aiga i aso fiafia ua mae‘a o le Kerisimasi ma le Tausaga Fou.
O se solitulafono muamua lea ua aliali mai ua tupu a o alu se faigamalaga mai se isi atunuu mo Samoa.
