Sainia le maliega o fesoasoani tupe a Niu Sila mo Samoa

O le a oo atu i le 23 miliona tala fesoasoani a le Malo o Niu Sila mo Samoa e pei ona faataoto i se maliega ua mae‘a sainia e le afioga i le Palemia, Susuga Tuilaepa Lupesoliai Sailele Malielegaoi ma le minisita o le va i fafo o le Malo o Niu Sila, Murray McCully.

Ua toe tuuvaa ese le alii minisita ma lana aumalaga toatele e lata i le 80 ina ua mae‘a talanoaga ma taitai o le Malo o Samoa lea na taualuga i le sainia o le maliega e faamautu ai fesoasoani a le Malo Niu Sila mo Samoa.

O le asia e le alii minisita o le afioaga o Poutasi i Falealili, na ia faalauiloa ai se foai tupe e $250 afe tala mo le fausia o le nofoaga tutotonu mo lea afioaga, o se vaega o fesoasoani o mafatiaga na aafia ai se vaega o Samoa i le sunami. O le iai i Samoa o le aumalaga na feiloai ai ma nisi o le aufaipisinisi i le atunuu mo le faalauiloaina o taumafaiga a Niu Sila, e unaia pisinisi e fia auina atu i fafo oloa e faatau ai i le taimi o le taligamalo a Niu Sila i le Ipu o le Lalolagi, lea e 23 aso o le a faagasolo ai.

Ua faaalia ai e le taitaifono o tapenaga a pisinisi i Aotearoa mo lea faamoemoe, o le a matala le faitotoa mo ni oloa gaosi mai atunuu o le Pasefika e pei o Samoa e faatau ma faalauiloa i lea taimi umi a o faagasolo le Ipu o le Lalolagi.

O le kolisi maualuga a Faleata na usuai i ai le aumalaga a McCully i le taeao ananafi mo le faia ai o ni a‘oa‘oga i le taaloga o le lakapi sa feagai ma le alii o Jonah Lomu, auā tasi lea autū o le malaga asiasi a le alii minisita o le va i fafo i Samoa, le Atu Kuki, Tonga ma Niue, o le faalauiloa o tapenaga a Niu Sila mo le Ipu o le Lalolagi i le lakapi iuni.