E 109 moliaga o le gaoi a o avea ma tagata faigaluega ua faamaonia o le tamaitai o Joyce Wilson e toafā ona alo, lea ua nofosala i le falepuipui mo le fā tausaga. Sa galue o ia i le kamupani o le Fletcher o se pule i le ofisa poo le office manager.
Sa iai ma le faatagaga e aofia ai ma lana saini i le sainia o siaki mo le totogiina o pili ma isi auaunaga a le kamupani. E toalua isi tagata ofisa sinia o le kamupani latou te sainia le tusi siaki. O le faatagaga lea ona o ia o le pule o le ofisa na saofaga ai ma sana gaioiga faasolitulafono na faia i le va o le aso 11 o Ianuari o le tausaga e 2013 ma Oketopa o le tausaga e 2014.
I moliaga a leoleo na faia faasaga ile tamaitai, o loo ta’ua ai o le sainia e isi tagata sinia e toalua e aofia ai ma le pule sili o le kamupani o siaki, sa faapea ona toe avane ai e le tamaitai siaki pe a uma ona saini le pule sili ona ia faaaogā lea o se titina poo se white out e aveese ai le igoa o le kamupani poo ai lava le ofisa o loo ave i ai le siaki ae tusi ai upu o le cash. O lona uiga e ave le siaki e tala tupe i le faletupe.
O lana gaioiga lea na faia i le tele o siaki a le kamupani ma sa ia tala ma ave faaaogā mo ia lava. O le aofaiga atoa o le seleni a le Fletcher na aafia ai e $228,390.12 sene, ma na faaalia e le faamasino sili le afioga Patu Tiavaasue Falefatu Sapolu, o se tasi lea o solitulafono tau i moliaga o le gaoi a o avea ma tagata faigaluega ua maoae se tupe ua aafia ai, ua oo atu i luma o le faamasinoga.
Na faaalia e le faamasino sili, e matuā leai ma ni itu lelei i le silasila a le faamasinoga i le faia e Joyce o le solitulafono, ae o lona ioeina o moliaga uma e 109 o se faaiuga ua ia faia mo ia lava. I le vaai a le faamasinoga ua faasaoina ai le taimi o le faamasinoga e suesueina ai ni molimau.
O le siaki pito telē na tala e le tamaitai e silia i le sefulu valu afe tala. Na faaalia e le faamasino sili pe ana lē maua le solitulafono a lē ua molia ma faasalaina, semanu e faaauau pea. Ua lē o se taimi muamua lea ua oo ai ni moliaga faapenei i le faamasinoga, ma o le fā tausaga o nofo falepuipui ai lea tamaitai i le toese ua manatu le faamasinoga o le a momoli atu ai se feau tāua ia i latou o fuafua e faatino, e lē ‘alo le faamasinoga ma le tulafono i le faia o faasalaga e faaitiitia ai nei ituaiga o solitulafono.
I se tasi o mataupu faapenei o loo suesueina e leoleo ma e leai nisi ua molia, o se seleni e tusa ma le lua selau afe a le kamupani o Ah Mau. O loo tuua‘ia ai ni tamaitai se toalima o le kamupani e galulue nisi i le kilivaina o oloa a o nisi tamaitai e galulue i le ofisa i le vaega o tupe.
