Ole laina o fesootaiga i lalo ole sami ua faaigoaina ole Tui Samoa Cable ole a maua ai e tagata uma i Samoa se fesootaiga sili ona saoasaoa toe taugofie. Ole folasaga lea ale taitai ole Malo le afioga ile Palemia, Susuga Tuilaepa L Sailele Malielegaoi, ina ua saunoa ile sainiga ole maliega a atunuu o Fiti ma teritori ole Malo o Farani ile Atu Polenisia motu ia o Uea ma Futuna e lagolagoina ai le fia auai foi o ia atunuu ile laina o fesootaiga a Samoa mo le maua ai e o latou foi tagata o fesootaiga sili ona televave ma saoasaoa.
Ole galuega lenei na amatamea ai le afioga Tuisugaletaua Sofara Aveau a‘o avea ma Minisita o Fesootaiga ile paeaiga ale Palemene ua mavae atu ile lima tausaga talu ai nei. Ole afioga ile Minisita fou o fesootaiga, Afamasaga Rico Tupai ua ia faaauauina le poloketi lenei ale Malo ua galulue faatasi ai nisi o itutino ole Malo ma kamupani poo pisinisi o fesootaiga i Samoa e pei ole Bluesky, Digicel, ma le Computer Service Limited lea e iloa i lona ta‘uga faapuupuu ole CSL.
E 1,470 kilomita le umi ole laina o fesootaiga ole a toso atu i Samoa e tau atu ile motu o Viti Levu i Fiti ma faaauau atu ai seia taunuu i motu o Uea ma Futuna e latalata tele mai ile motu o Savaii faapea ma le motu lata mai i Samoa o Tonga le motu o Vava‘u.
Ole Aso Faraile ua mavae atu nei na sainilima ai Uea ma Futuna ma Samoa ae o Fiti e pei ona faaalia ele Pule Sili ole Tui Samoa Cable, Pepe Fiaailetoa Christian Fruean, ua mae‘a ona saini ile maliega, o lona uiga na muamua sainilima lea motu tuaoi ile maliega.
Ole faamoemoe tāua ole Malo pe a mae‘a ona faataoto le laina o fesootaiga i lalo ole sami ma amata faaaogā, ole maua ai lea o fesootaiga ma atunuu i fafo e maua mai ai a‘oa‘oga tau soifua maloloina e faaaogā ile tautua faalesoifua maloloina i Samoa.
O fesootaiga ia e mafai ai ona faia i Samoa se taotoga ose gasegase e pei ole ma‘i fatu ae faaaogā fesootaiga televavave faaonaponei e faatonutonu mai ai e fomai popoto i fafo le faatinoga ose togafitiga faafomai.
Ose faiga a taunuu ole a mafai ona a‘oa‘oina ai fomai i Samoa, ae ole a sili lea ona taugofie nai lo le tulaga o iai nei ole ave i fafo ose gasegase e lē o maua ni togafitiga i Samoa e faia ai se taotoga poo se togafitiga faafomai. E lē gata i auaunaga faalesoifua maloloina e tāua ile galuega ole laina fou o fesootaiga, ae faapea i a‘oa‘oga mo isi tomai faapitoa.
