O le faaiuga o le vaiaso lea na sainia ai se feagaiga i le va o le Iunivesite Aoao a Samoa i lana aoga faatusitala ma le Iunivesite o le James Cook i Ausetalia.
O se feagaiga o le a vaaia ai polokalame fai faatasi i le va o nei aoga i totonu o ia Iunivesite e lua ma le faamoemoe e faaleleia atili ai lenei foi tomai e lē gata i Samoa nei ae faapea foi i Ausetalia.
O lenei feagaiga na sainia i le va o le Tapaau poo le Pule o le Iunvesite Aoao a Samoa le afioga Polofesa Fui Leapai Tuua Ilaoa Asofou So‘o, le tasi o faiaoga e toalua o le aoga faatusitala i Samoa, Misa Vicky Lepou, o faiaoga o le aoga faatusitala o le Iunivesite o James Cook University o Dr Maxine Newlands ma Dr Marie M’Balla-Ndi.
“O le amataga lenei o se faiga faapaaga o le a saga unai ai le tulaga o le tomai faatusitala aemaise le taumafaiga a le Iunivesite Aoao o Samoa e siisii le maualuga o lenei aoga i totonu o le Iunivesite ina ia mafai ona tali atu i manaoga o ofisa faasalalau ma lomiga i totonu o le atunuu,” o se saunoaga lea a le afioga i le Tapaau a le Iunivesite.
O se maliega lenei o le a vaaia ai le galulue faatasi o tama ma teine o lenei aoga i atunuu e lua ina ia mafai ona malamalama le isi vasega i auala o tusitusiga i le isi atunuu aemaise foi o le eseesega ona o le siosiomaga, o tu ma aganuu aemaise o isi mafuaaga e ese ai tusitusiga ma le lipotia o nei mataupu.
O le a maua ai ma le avanoa e feasiasia‘i ai alii ma tamaitai tusitala i le va o atunuu e lua ma ua iai ma se sikolasipi o le tausaga atoa mo se tusitala faaolioli mai i Samoa nei e faamae‘a ai ona faailoga faatusitala i Ausetalia i le aoga faatusitala a lenei Iunivesite ma e maua foi le avanoa e aooga ai nisi o i latou o loo i Ausetalia i Samoa nei faavaitaimi.
O loo faatupe nisi vaega o lenei feagaiga ma aoaoga e le faalapotopotoga o tusitala ma ofisa faasalalau a le Pasefika le PACMAS ma o le unai i lenei vaega o lea polokalame ina ia mafai ona unai le lipotia e sui o nei aoga o le tulaga ogaoga ua iai suiga o le tau, o le tulaga o tamaitai i le Palemene, o tusitusiga e aafia ai aganuu eseese e lua.
