O alii Saina o Yang Quigreen ma Zhong Shuiming oloo nofo taofia ile Falepuipui i Tafaigata e faatalitali ai le aso e lauina ai so la faasalaga. Na nofo taofia mai lava i la’ua talu ona maea ona lau le faaiuga a le faamasinoga ua faamaonia o la moliaga e sefulu fa ole maua oni tupe mai ni auala faagaoi lea na la talaina ai masini talatupe ole BSP Bank.
E $70,000 le aofaiga atoa ole tupe na aafia ile soligatulafono a ia alii Saina. Ina ua aumai nei alii ile faamasinoga ile dso Faraile ua mavae mo le fofogaina o se faasalaga ma tuuina atu finauga faaiu a loia e fua iai se faasalaga, na faailoa ane ai e le la loia ile tusitala le faitioga a alii Saina ile tafasi o la’ua e ni alii oloo loka faatasi i latou ile potu taofia. Na faaaliali ane e le isi alii lona laugutu ua totolia totonu, ao le isi ua faaaliali ane lona au taliga e maosia. Fai le la loia le susuga Alex Su’a ole a talanoa ile pulega ole Falepuipui e tusa ole tulaga ua faailoa atu e alii Saina oloo ia tauaveina finauga oo la moliaga.
Ole tulaga faigata ile tuu fesilisili a le tusitala i alii Saina sei tau maua ai le atoaga ole la faitioga ona e le lelei le faapeletania. Ua nao taga e fai ane io la lima e malamalama ai. O alii Saina nei sa le faataunuuina le tuuina atu o folasaga mulimuli a loia ona e lei saunia se folasaga faaiu a le itu a leoleo.
Ole mafuaaga lea ole tolo atu ile vaiaso mulimuli ole masina nei e lauina ai finauga faaiu ona faatoa iloa ai lea ose aso e lau ai se faasalaga o ia taulele’a e to’alua. O masini tala tupe a le BSP Bank na mafai ona tala e ia alii tupe ona ose faiga e faaaoga ai ni pepa tala tupe na o mai ma ia alii ina ua ulufale i Samoa.
E ta‘ua lea faiga faagaoi o tupe i masini talatupe poo ATM Machines ole Skimming. E toatolu alii Saina na faia le solitulafono peitai na toe malaga ese ma Samoa le isi toatasi ao lei lipotia le solitulafono i leoleo.
E amata atu suesuega a leoleo ua leai ma Samoa le isi alii Saina ua toe foi. Ua faaalia e le afioga ile Faamasino ole faamasinoga faaitumalo oloo tauaveina suesuega o moliaga o ia alii Saina le afioga Fepuleai Ameperosa Roma, ole a toe nofo taofia i la’ua i Tafaigata e faatali ai le aso 24 ole masina nei o Iuni.
