Sailiga seleni o “Le Dinner of Hope” a le SVSG

O le aai o Sini na faataunuu ai le sailiga seleni a le vaega o le Toomaga mo ē Puapuagatia, i le Aso Toonai, aso iva o Aukuso.

O le auga o le faamoemoe o le fia fesoasoani o le lala o le faalapotopotoga i Sini, e faatupe le totogi mo se tagata faigaluega tumau mo le nofoaga o tamaiti a le faalapotopotoga i Samoa.

E pei ona tusia i sa tatou lipoti i nai masina ua tuanai, o lenei anavatau tāua ma le aogā ua loa tausaga o tautua mo o tatou tagata puapuagatia, e faalagolago lona faatamoeina i le tele o fesoasoani mai faalapotopotoga i atunuu i fafo. O le ala foi lea na a‘e ai se tofa i le peresetene ma le ofisa i Sini, e faia “Le Dinner of Hope” e saili ai se seleni.

Na auai mai le taitai aoao mai o le Toomaga i Samoa ae faapea foi ma isi setete o Ausetalia, e aofia ai se aumalaga mai le aai o Melepone.
O le afioga ia Toilolo Talosaga Taulapapa ma le faletua ia Pei na taitaia le malaga e toavalu tagatānuu mai Toga ma Samoa e toafā, na fai i latou ma sui o le Doors of Opportunity ma le leitio a le La‘u Samoana.
Na saunoa le faletua ia Pei, e uigaese le matagofie ma le mae‘a tapena lelei o le faamoemoe i lea po, e lē gata i taumafa, ae o faafiafiaga na solo lelei ai le taliga o le sua. Na faatino ai foi ma se sao o Melepone i fiafia.

Na ia faafetaia foi le tuuina atu o le faaaloalo latou te taualugaina ai le faamoemoe o le SVSG i Sini. O le vaaiga sili o le afiafi, o le tauaaoina atu lea e le SVSG i Sini, o le siaki e sefulufā afe (14,000) tala Samoa i le taitai mai Samoa, le tina ia Lina Chang, mo le faamoemoe e pei ona faataunuuina ai le dinner. Tau ina ia faamanuia pea le Atua i laasaga uma o le SVSG.
Afioga Toilolo ma Pei Taulapapa (itu agavale) ma le aumalaga mai Melepone

L-R – Jeffery Ropati, Pei Taulapapa, Lina Chang ma Toilolo Taulapapa

Le taimi na tauaao atu ai le siaki e $14,000 tala Samoa i le faletua ia Lina Chang