Sailiga ose paga a Laauli Joseph Parker

E toatele le au muimui ile paga fou a Parker. Faapea e le ose fusuaga moni le fusu o Laauli Joseph Parker ma le numera 14 ale WBO.

E faapea foi nisi ua palaai Parker i lona lē taliaina o isi lui mai isi tama fusu e iai Deontay Wilder le siamupini ole WBC ma Dominique Breazeale lea na faia‘ina ai Igu Uzonoh le uo mamae a Parker.

Peitai, o nei faitioga uma e faigata ona talia ona ole puupuu ole taimi ma le avanoa e saili ai se tasi oloo saunia ma tapena lelei e fusu ma Parker.

Ole lui a Deontay Wilder ia Parker e tuu le fusuaga a Parker lea ia Me, ae fai se la fusuaga ma Parker i fusi e lua oloo la umia, peitai, e le mafai lea i lalo ole tulafono ale WBC lea e iai i lalo Wilder.

E ao ona fusu Wilder ma se tama fusu e tofia e lea pulega. Ae ole manao o Wilder e faatali Parker la te fusu  ile masina o Iulai.

E le fetaui la le lui a Wilder ma fuafuaga a Parker ma lana pulega.

Ole lui a Breazeale lea foi na togi mai ia Parker, e lua lape o lana lui, e le o sauni Breazeale e fusu ile aso 6 o Me, e manao e fusu ma Parker ae ose isi aso e fai ai le fusuaga pe a lava ana tapenaga, e le gata i lea, e fai lava si tele ole tupe na manao Breazeale e fusu ai.

O nisi faitioga e faapea sa tatau ona tolopo le fusuaga se‘i mafai ona fusu ma Hughie Fury poo se tasi e fetaui lelei ma Laauli.

Oloo teena foi ele Duco Events ona o itu nei, ole le fusu ai o Hughie Fury ole a lē maua ai e Parker le tupe na folafolaina mo le fusuaga e $2.4 miliona Amerika.

A faapea e tolopo le fusuaga o lona uiga ole a atoa le ono masina e leai se fusuaga a Parker e faia, ma leai ai foi ma se tupe nate maua. Aisea la ole a lusi ai fua tupe maua a Parker ona ole tau faatalitali ia Hughie Fury?

Ole isi itu ua mae‘a ona tolo muamua e Fury le fusuaga mai ia Aperila ia Me. Ole a toe tolo foi la ona ole manao Fury? E le fetaui.

O fuafuaga ale pulega a Parker, ia faatolu ona fusu Parker ile 2017.

Ole faamoemoe e fusu Parker ile masina o Aperila, Iulai ma Oketopa. Peitai, a toe toso atu i tua le fusuaga, ole a lē atoa ai fusuaga a Parker mo lenei tausaga. Ole 2106 e faalima ona fusu Parker.