A‘oa‘o le tama e tusa ma ala o le Atua, auā a matua e le toe tea ese ai. Atonu o le tasi lenei o mafuaaga e faamalosia ai pea le aufaigaluega o le talalelei, e faataunuu ma faamaopoopo autalavou i totonu o Ekalesia, auā o lumanai ia o nuu ma aiga.
O le Aso Sa na tuanai atu aso 10 o Fepuari, na faapitoa lea o le Aso o Tupulaga Talavou o le EFKS i le aai o Melepone, na auai atu ma molimauina e la tatou auaunaga le sauniga a le Ekalesia i Brimbank lea o loo tausia e le susuga i le faafeagaiaga taulagi ia Samani Sila ma le faletua ia Moana Sila.
E lua vaega na vaevae i ai le autalavou, o le vaega a Taemā lea na taitaina e Falemalietoa, ma le vaega a Tilafaigā lea na taitai ai Seigafo Tovi.
O vaega faatino sa faatāuaina i le sauniga, o le faaevagelia e ala i le faatinoina o se tala mai le Tusi Paia, faatasi ai ma le pese faaleagaga a le vaega, na maofa le tele o mātua o le Ekalesia ona o faatinoga a alo ma fanau, auā na vaaitino ma sila manino i le faatāuaina o le autū o le aso, o le “sailiga manogi mo le atinaeina o tupulaga talavou”.
O faatinoga faapenei e tāua tele i le tupulaga, auā e aoaoina ai o latou ola tuputupu a‘e, ma malamalama atili ai i lo latou tāua i totonu o Ekalesia, aemaise o le silafaga ati a le Atua silisiliese, e le gata i lea, o le tupu ma ola o Ekalesia pe a fiafia nisi o tupulaga e fai ma sui o autalavou ma tautua ai i totonu o Ekalesia, ae faapea foi le fealofaniga i fanau a Ekalesia.
E le masalosalo na pulupulu ma laei lo tatou Alii i le viiga na toe faafoi atu i lana afio, ina ua faamae‘aina ma le manuia le faamoemoe sa fau po fau ao, ae faapea foi le faamalieina o le silasila a le tamā o le galuega ma le faletua, ae tainane le tapuaiga mau a nai tuaa sinasina ma mātua, ma le maave eseese o le Ekalesia malosi.
Na faamanuia le susuga i le faafeagaiga i le tupulaga talavou, ina ua mae‘a ona molimoli lona agaga faafetai.
