E ui ua loa tausaga o alaala ma aumau tagata Samoa ile aai o Melepone, peitai, ole Aso Toonai 29 Iulai, ole a faataunuuina ai mo le taimi muamua le uluai tauvaga tausala, e sailia ai se tamaitai lalelei e fai ma sui o Melepone ile tauvaga ole Miss Samoa 2017-2018.

O lenei faamoemoe oloo faatautaia ele CANTOA Events, ose kamupani oloo pulea e le Afioga ia Paulotu Canada McCarthy ma lona faletua ia Aumua Toafa McCarthy. Ise feiloaiga ma le afioga ia Aumua na ia ta’ua ai. “Ua maitauina lava le faatupulaaia pea o tagata Samoa ua aumau i Melepone, aemaise le tupulaga talavou, ma ole mafuaaga lea ua manatu ai, ua tatau ona faavaeina se Miss Samoa Victoria, e amanaia ai le toatele o tamaitai lalelei o Melepone.

E le ose miti na tau mamate le tofa mamao ia Pulotu ma Aumua faapea le CANTOA Events, auā e toatele tamaitai na faaulu atu o latou suafa e fia tauva, peitai ua filifilia ele Komiti Faafoe tamaitai lalelei e toafitu e tauva mo le sailia ose Miss Samoa Victoria 2017-2018. Na ta’ua foi ele afioga ia Aumua e faapea, ole a faaauau pea i tausaga taitasi ona faataunuu le tauvaga lenei.

O tamaitai ua filifilia ole a tauva ile uluai Miss Samoa Victoria, e aofia Carol Talalupe Telea mai Lotofaga ma Aleipata oloo lagolagoina ele M5 Island Wear, Olivia Howman mai Fasitoo ma Lotopa oloo lagolagina ele Essential Recruitment.

O Adele Faaosofia mai Neiafu ma Fagalii oloo lagolagoina ele JNL Financial Services PTY Ltd, o Laila Purcell mai Aleipata ma Laulii oloo lagolagoina ele KK Design. Hope Asekoa Tanuvasa mai Nofoalii ma Niue oloo lagolagoina ele Cheetas, Feagaiga Pasa mai Luatuanuu ma Saleaumua oloo lagolagoina ele Conrock, ma Irene Siania mai Samatau ma Falelatai oloo lagolagoina ele Tasioleloto.

Ole tamaitai e manumalo ole a iai ona tiute faapitoa e pei ona masani ai tausala faapaleina, e le gata i lea, ole a malaga atu i Samoa ile masina o Setema e tausinio ile tauvaga ole Miss Samoa 2017.

I tausaga ua mavae e lua lava tausala mai Ausetalia e tauva ile Miss Samoa, ole Miss NSW mai Sini ma le Miss Samoa Kuiniselani mai Brisbane, peitai, o lea ole a toatolu nei tausala mai Ausetalia ile Miss Samoa Victoria.  Ole vaega ua faamoemoe e faamasino ai le tauvaga e aofia ai le Traditional Wear, Sarong, Taleni, Puletasi ma le Interview poo le faatalatalanoaga.

Ole Aso Toonai 29 Iulai 2017 ole a faataunuuina ai le tauvaga ile Grand Star, 499 Grieve Parade, Altona. Na faailoa foi le agaga faafetai ole CANTOA i pisinisi ma kamupani oloo latou soosoo tau’au e lagolagoina le faamoemoe.

E pei ole Kara’s Fashion, South Seas Pictures, Matiniuel Screenprinting, Elisa Hotel, Mahealani Island Wear, Nesian Creations, Iron Armour Academy, Personel Solutions, Mateo, Mata Leao Wear Brazil.

Mo nisi faamatalaga e uiga ile faamoemoe faapea pepa ulufale faafesootai ane le 0481267158 poo le imeli misssamoavictoria@gmail.com.

Faamatalaga na tuuina mai

Comments

comments