Panmure ma Mount Wellington 2015
E lei maua se avanoa mo isi o taavale na mulimuli atu i le car paka a le aoga tulagalua a le Bailey School i Mount Wellington i le faatumulia o le mamalu o le atunuu, i uo ma aiga aemaise sui o le Ekalesia o le Heart of Worship sa molimauina le tauvaga muamua a lenei Ekalesia sa faatinoina i le hall a lenei aoga i le po o le Aso Toonai ua mavae 7 o Novema.
O lenei faamoemoe sa tuufaatasia e tiakono a le Ekalesia o loo taitai ai le tofa ia Laupua Tagialao ma lona ofisa, auā lava le atinaeina o le galuega a le Atua. O auga o aute o lenei polokalame o le faaalia lea o le muumuu i le itupa o tamaitai e matagofie lona suiina poo le sikaili, o le matagofie o le elei o loo faaaogāina, faatasi ai ma le interview, ae o le itupa o alii o le faaalia lea o le Aloha mao‘i, e vaivai le material o loo su‘i ai ma lelei le faamatalaina o foliga o le ofu faatasi ai ma le interview.
Na tatala le polokalame i pesepesega a le aufaipese, ma saunoa faafetai ai loa le faafeagaiga ia Avele Tanielu e faafetaia le alofa o le Atua ona ua faataunuuina ma le manuia le faamoemoe e pei ona nofo tatalo ai le Ekalesia, aemaise o lana faamalosi i le au tauva o le po, e lē o le tauvaga ae o le loto fiafia o le tagata i le Atua auā ua latalata lona toe afio mai.
O le susuga ia Neil Iose ma lana soatau ia Andrey Tanielu sa faasoasoaina laei tauva o le po, ae o le ofisa o tiakono sa faamasinoina le tauvaga, le tofa ia Laupu Tagialao, Mercy Ainiuusi (Teutupe) ma Alisa Lemoa (sui taitai).
E 25 sui sa auai i le tauvaga, e 12 alii ae 13 tamaitai, ma sa vaevaeina i vaega e tolu. Ma o lenei polokalame sa tatala le avanoa i totonu o le Ekalesia i se sui e fia tausinio. Ae na maitauina le toatele o tina ma tamā sa auai e lagolago faatasi ai ma le susuga i le faafeagaiga ia Avele Tanielu ma lona faletua ia Talalelei sa militino faatasi ma lana lafu mamoe auā lava le faamaopopoina o lenei faamoemoe.
E lei faigofie le faaiuga a faamasino i tagata uma, auā ua faaalia le matagofie o laei i muumuu o tamaitai i latou fika ae faapea i Aloha o alii. Ae o se vaaiga ese foi lea ina ua tautino e nisi o sui tauva o mamanu ma sikaili na su‘iina e o latou fanau ma ua faailoa ai le taleni ma le meaalofa ua tuuina i ai e le Atua.
E toasefulu sui na filifilia mai i le 25 o tagata tauva, e toalima tamaitai ma le toalima o alii, o le faletua o le faafeagaiga ia Talalelei Tanielu, Elaina Fiu, Lusia Siu, Bernice Esera ma Shirley Musolini. O alii o Faleiva Siu, Iese Tapuvae, Fiu Panapa, Uaita Fata ma Iose Toi.
O le faaiuga a faamasino na latou autasi ai i le faletua ia Lusia Siu i le tulaga muamua i le muumuu e matagofie lona su‘iina, tulaga lua le faletua ia Bernice Esera ma le tulaga tolu o le faletua ia Shirley Musolini.
O Aloha a alii na sola ai Fiu Panapa i le tulaga muamua i le Aloha mao‘i, tulaga lua o Uaita Fata ma le tulaga tolu o Iose Toi, ae sa faamanuia uma lava nisi o sui tauva sa auai i nisi o faailoga na saunia lava e le komiti ma le Ekalesia.
O le saunoaga mulimuli a le susuga i le faafeagaiga ia Avele Tanielu na ia faafetai ai i le mamalu o le auvalaaulia i le lagolagoina o le faamoemoe aemaise o le laulau a tiakono na latou tapenaina lenei polokalame ma faaiu ai loa i le taumafataga na saunia e le Ekalesia o le Heart of Worship.
Asiasi i le www.samoatimes.co.nz ma faitau ia tatou talafou o le Samoa Times pe afai ua e misia le pepa o lena vaiaso
