Ua liva le foe a le tautai ina ua pale ma ua iu manuia le faamoemoe ua leva ona lāvasi. Na uigaese le matagofie o teuga eseese ma le lagolago a le mamalu o le atunuu i le po o le Aso Toonai aso 7 o Mati, a o faataunuu le famoemoe o le sailiga seleni a le lālā o le Toomaga mo ē Puapuagatia auā le fia fesoasoani atu i le moomia mai Samoa.
O lenei faamoemoe e faatasi i le tausaga, ma o se sao lea o Kuiniselani mo alo ma fanau o loo i totonu o fale apitaga i Samoa.
O le Faatonu o le Samoa Victim Support i Kuiniselani o le faletua ia Eseta Frost. Failautusi o Brenda Mauigoa; Teutupe o Poliana Magele; Event coordinator o Lanuola Schuster; Komiti o Tapenaga o Kaffy Timoteo.
O le susuga ia Sulieni Layt sa avea ma Fofoga o le po. Na auai le toatele o le aufai pisinisi, ma le mamalu lautele o le atunuu e aofia ai le Miss Samoa Ausetalia ma le Komiti lea sa tatalaina le po i le siva Samoa.
Logomālie le faaili a le Oti Band o loo faauluulu i le faafeagaiga ia Pr Su ma le faletua ia Avataeao Oti (Ekalesia Penetekoso), sa faafiafiaina le po.
O le tofa ia Leautuliilagi Sogialofa Vaatausili Tuala Tamalelagi Leapai sa fai ma sui o le Toomaga mo ē Puapuagatia e faafetaia le mamalu o le atunuu sa auai (Faufautua a le Toomaga mo ē Puapuagatia i Kuiniselani faatasi ma le afioga ia Taulapapa Lemalu Roy Slade).
O le Aso Gafua na tuuvaa atu ai le Faatonu ia Eseta Frost ma le failautusi ia Brenda Mauigoa mo le fonotaga e usuia i Samoa a o tālia mai e le Peresetene ia Lina Chang o ia foi lea o le Faatonu i le lalolagi mo lea fonotaga.
Na faafetaia e le Faatonu le toatele o i latou sa lagolagoina le faamoemoe aemaise o nisi o loo galulue i totonu o le Komiti. Faamanuia le Atua.
