O tamaitai tauva mo le Miss Samoa Victoria 2018

O tamaitai tauva mo le Miss Samoa Victoria 2018

O le afiafi o le Aso Toonai, aso luasefulu ma le valu o le masina ua tuanai atu, na ofaga potopoto ai le atunuu aemaise o uo ma tau aiga o tausala lalelei e to’aono ia ua mautinoa lo latou sauni e tauva ma saili poo ai se o le a avea ma lalelei o le aai o Melepone ma le setete o Vitoria e tauva i le Miss Samoa 2018, i le Teuila o le tausaga nei.

O le fiafia ma le faalauiloa {launch} sa faia i le laumua o le aoga a le Dallas Brooks, na matauina le faatumulia, leai se ofi ma sa faia faa siva ma saili seleni ai le komiti faafoe fou lea ua uma nei ona resitala faatulafonoina e avea o le komiti e faafoefoeina ma faatinoina sailiga tausala Samoa mo le setete o Vitoria.

Ua silasila le komiti ua tulai mai e ao loa ona faataoto ni alafua ma ni taiala aemaise o le resitala faatulafonoina o so latou lava tino e faafoeina lenei faamoemoe taua mo alo ma fanau tamaitai o le atunuu, i faamuamuaga la ua tuuina mai, ua resitalaina nei ma faamautuina i ai le igoa, “Faiva o alofilima o tamaitai” o le komiti faafoe ua avea le afioga ia Lemalu Faatau ma Rita Seumanutafa ma Faatonu Sili, lagolagosua i ai Tamara Puni ma Gina Taupau Tafea, o le aao tusitusi o Tony Fretton ma le Teutupe o Filomena Vaisaili Wairasi.

O tausala e to’aono ua mautinoa nei lo latou tauva o Karen Sooaemalelagi, Rachael Aulelio Fili, Rona Alainuuese, Shanasha Tanuvasa Tofaeono, Norah Aloiai ma Britanny Aiono, o lo ua faataoto nei le faamoemoe i le aso iva o le masina o Iuni o le a faia ai le tauvaga , i le mae’a ai o le alo o le atunuu i le faamanatuina o lana sisigafua mo lenei tausaga. Na faaalia foi le agaga faafetai ma le mitamita o le komiti, ona o le lagolago a nai o latou aiga ma paaga aemaise o le tatalo ma le lagolago a le atunuu faapea uo ma aiga a sui tauva.  O outou mama na, faamanuia le Atua i o tou faiva alofilima, i ai pea lona filemu i o tou ala uma, ma manuia tele tamaitai tausala o le a tauva.

Comments

comments