O le faaiuga o le lua vaiaso talu ai, le vaiaso tonu lea na tatala ai taaloga a Tupulaga Talavou o Malo o le Taupulega na lipotia mai ai i le Aso Sa le maua o se tino o se tamaitai o Nuu ma Samauga i Savaii i Faleula.
O luma ane o se faleoo i Nuu na maua ai lona tino maliu o loo taoto telenoa ua leaga uma foliga. O se auala faigata lea o le maua o le tino o lenei tamaitai e 49 tausaga le matua.
Mai i le Aso Sa lea seia oo mai i le amataga o lenei vaiaso, e lei iai lava ni faamaumauga lelei a leoleo e faatatau i lenei mataupu ona o loo faagasolo lava suesuega faasaga i ai.
Ona pau le faamatalaga a le sui sooupu o le Matagaluega o Leoleo, Su‘a Muliaga Tiumalu, o lea faatoa aoao lelei ni faamatalaga mai i suesuega ona na alu le vaiaso atoa o agai leoleo mo a latou galuega o le leoleoga ma le puipuiga o taaloga a Tupulaga Talavou ma le vaiaso foi o le Teuila latou, ae o lea faatoa foi ane leoleo e faagasolo a latou suesuega.
Na agai le tatou ofisa i le nofoaga na maua ai le tino o lenei tamaitai ma na vaaia ai o se faleoo lenei o loo i totonu o se pa o manu papalagi i Nuu ma na maua ai ma se alii talavou na fasi ai i le po lea ma o loo tau faapipii le auvae ua matuā leaga uma ona o le osofaiga o ia. O le faamatalaga a lea alii na valaau atu le tamaitai lea ua maliu, ona o masaniga lava e masani ona tafafao faatasi ma o lea na alu ane ai i le faleoo ma vaaia ai e lua ni fagu pia o loo tutu i autafa o le tamaitai ua maliu nei.
Ua leva ona inu le alii talavou lea ma na ia ta‘ua e tasi lava le fagu na taumafai e inu a o talanoa ae ona leiloa loa ma se mea ua moe. Na te‘i ane ina ua tu‘i e se isi lona ulu ma oso loa ae tau ma le maa i lona auvae lea ua afaina ai ma ona fofoga. Na tamoe i lo latou aiga e lē mamao ese ma ave ai loa o ia i le falemai.
Faaalia e lenei alii a o lei alu i le falemai na talosaga i se isi ona tei ina ia toe foi i le faleoo e vaai lona pulou na pa‘ū ai ae e alu atu lona tei lea o loo moe mai ai se isi alii o loo suesue nei e leoleo i le fale lava lea ae ua lē vaaia le tamaitai e pei ona valaau atu e alu atu. O le alii lea na fasi i le po lea e 25 tausaga le matua.
O i latou nei o loo agai uma i ai suesuega a leoleo i le taimi lenei. Faaalia e Su‘a Muliaga Tiumalu e foliga mai lava e toatele tagata e aafia i lenei mataupu ae e oo mai i le taimi nei e lei iai se faaiuga a Leoleo poo ai tonu e molia i le maliu o lea tamaitai.
E lei finagalo foi le toalua o lenei tamaitai e talanoa mai e faatatau i le mataupu se‘i vaganā ai nisi sui o le aiga na ta‘ua na agai le tina i se fono a se komiti o faigapalota o loo aofia ai i le Aso Toonai ma le toe foi mai ai lava i le aiga.
