Ua tāloina fonotaga e lē gata i le faaiuga o le vaiaso ua tea ae o le amataga foi o lenei vaiaso ina ia saili fofo le Matagaluega o Aoga ma le Pulega o Aoga a le Katoliko i le tulai mai pea o fusuaga i taimi o taaloga ua faatautaia i le va o nisi o aoga.
O le faaiuga o le vaiaso na tea nei i le tumutumu sa maimoaina taaloga a Kolisi maualuluga ia o loo faagasolo i Samoa mo le faagatama o le lakapi, na toe tulai mai ai foi ni vevesi i le va o le Kolisi o Sagato Iosefo ma le Kolisi o Avele.
O vaiaso ua tuanai atu o vevesi na tulai mai i le va o Kolisi a le Ekalesia a Iesu Keriso o le Au Paia o Aso e Gata ai ma le Kolisi o Sagato Iosefo, mulimuli ane o le Kolisi o Avele, lea na faaiu ina ua agai taitai o le kolisi a Pesega ma faatautaia se faatoesega i le Kolisi o Avele.
O le va o Sagato Iosefo ma Avele ua tele ni faafitauli ua tulai mai ai. Ua tele foi ni galuega ua faia e faauluuluga o nei aoga i tausaga ua tea ina ia aumai faatasi tama taaalo ma fai ni faaleleiga. Peitai e foliga mai e lē o taofia ai lava vevesi nei.
O le mau a le Pule Aoga fou ua iai nei a le Kolisi, le afioga Matafeo Reupena Matafeo, o se faalata ma se pepelo faiga ia na sau ai faaleleiga nei ma faaipoipoga, auā ana moni e lē toe tulai mai ni vevesi faapea.
O le mau a le Faatonu Sili o Aoga a le Ekalesia Katoliko, le afioga Aeau Chris Hazelman, ua lē iloa poo le ā le isi faiga e taofiofi ai le lē usitai ma le lē mafaufau o se toaitiiti lava o tama aoga ua faaauau le faamisa.
Faaalia e Aeau o ia le isi molimau o lenei vevesi na tulai mai i le faaiuga o le vaiaso na tea nei, ma e mae‘a lelei lava le taaloga i lana faamatalaga, e leai ma se vevesi o tama o ‘au e lua ae o tua i le nofoaga o le au matamata na faalogoina ai lava le felafoai o faamatalaga mamafa ma o iina na amata mai ai lava le vevesi, ae lē o tama aoga.
O le faafitauli na amata loa fusuaga i tua ane o le malae feosofi mai ai loa ma tama o Sagato Isofeo e toaono ia na taofia e leoleo ma fesoasoani i tauaiga maa ia na tulai mai i lea aso.
Faaalia e le alii Faatonu Sili, o le faaiuga ua fai nei o ai lava le tama aoga e maua e leoleo ma ave ma faamaonia le faatupu vevesi ma le fai misa i nofoaga faitele e aofia ai lotoā o aoga, e lē toe fesoasoani i ai le matagaluega o aoga a le Lotu ae o le a tuu lava i leoleo e faatino i ai a latou galuega e tusa ai ma le tulafono.
Faaalia e Aeau, ua 12 tausaga o galue i lenei tofiga, na o le agai lava e tatala mai i tua tama aoga o aoga a le lotu pe a tulai mai ni vevesi faapenei, ae o le tausaga lenei e lē toe faia lea tulaga ma e agai ane lava aiga o nei alii e taofia e taumafai e toe tatala i tua.
O le a lē toe talia lava foi e le Aoga a le Ekalesia se tama o nei tama aoga mai le toe aooga ai i le Kolisi.
O le faamatalaga a le afioga Matafeo Falanaipupu Tanielu Aiafi, le Ofisa Sili o le Matagaluega o Aoga, Taaloga ma Aganuu, e leai foi se avanoa e toe ave i nei tama aoga, auā o lea o le a alu sa‘o lava o latou igoa i le tulafono ma o le a matuā faasā lava foi ona toe aooga nisi i aoga a le Malo.
Faaalia e Matafeo Falanaipupu, e leai ma se isi e iai se manaoga e taofia tama aoga i leoleo ae afai ona pau lea o le auala e mafai ai ona taofiofi le amio lē pulea o loo faaali pea, ona manatu lea ua talafeagai lelei le tali e ave i nei uiga faamisa.
“Matou te lē mananao e fufusu a tou fanau, matou te mananao e finau a tou fanau, i le aoga ma taaloga foi,” o le saunoaga lea a Matafeo Falanaipupu.
O le mau a le Felela o loo faauluuulu i ai Sagato Iosefo, le afioga Brother Siaosi Ioane, e leai ma se faaletonu i le va o faiaoga a aoga nei e lua ae o le fanau lava i le vaovaogata na vaaia ai loa tauaiga maa i le mae‘a ai o taaloga.
O fautuaga foi ua ave i mātua ina ia lagolagosua i le galuega a pulega ma faiaoga ina ia taofia nei uiga ua oo lava i faleaoga le faatinoga.
