Ua lagomau nei i lona nofoaga mau lē sa avea ma faipule o Gagaifomauga Numera Tasi le fetalaiga Tuilo‘a Anitele‘a Tuilo‘a e pei ona sa tumutumu ai le afioaga o Safotu i Savaii i le Aso Toonai na tea nei, e lē gata i aiga o paolo ma gafa ae o le mamalu o le Malo i ona vaega eseese.
O lea ua amata nei ona saili ai ma ni sui faatutū mo le palota laititi a lea itumalo e toe saili ai sona tofi faipule e faaauauina le tausaga e tasi ma masina o loo totoe o le paeaiga faapalemene o iai nei.
O le vaega faaupufai o le HRPP sa lagolagoina e le tofa Tuilo‘a ma lona itumalo mo paeaiga e lua sa avea ai o ia ma faipule. O le fesili pe faamata o le a faatumauina pea lea lagolago, e fua i sailiga a le Itu agai ma le vaega faaupufai o le Tautua Samoa i so latou sui e tauva i le palota laititi.
E lei faasalalauina mai se aso o le palota laititi ae mautinoa o se taimi o le masina fou o Iulai. O Gagaifomauga Numera Tasi sa tulai mai ai foi se isi sui o le HRPP le afioga Ga‘ina Tino, lea na lē toe manuia lona taumafai ina ua filifilia le tofa Tuilo‘a Anitele‘a i le faigapalota tele a le atunuu i le tausaga e 2001.
Sa avea foi Ga‘ina ma Minisita o le kapeneta mai le taimi o avea Tofilau Eti Alesana ma Palemia seia oo mai i le taimi o le taitaiga a le susuga Tuilaepa Sailele Malielegaoi.
Faaalia e se molimau e latalata i le vaega faaupufai o le Tautua Samoa, e lē faigofie le tapenaga a le latou pati ona e malosi le HRPP i le itumalo o Gagaifomauga Numera Tasi, peitai o le musumusu a lea molimau, e manumalo se latou sui pe a lelei tapena le lotoifale o se latou sui tauva o le a tasi i ai se filifiliga.
A o tapena lea faamoemoe o Gagaifomauga Numera Tasi, o le toe amatalia o tauaofiaga a le Palemene o loo usuia nei mo le talanoaina o le tala autu o le tupe na faasilasila aloaia ai e le Fofoga Fetalai le tuumalo o nisi o tamalii o faletua foi sa tauaveina le tofi faipule i nisi o paeaiga ua mavae.
O le afioga Leaupepe Taulapapa Faimaala Fuatino Filipo e pei ona iai se lipoti a le Samoa Times. O se isi tamalii sa avea ma faipule mo le itumalo o Palauli i Sisifo lea sa tulai mai ai le afioga Taulapapa Faimaala ma le susuga Taua Faraimo ua tuumalo.
Sa avea o ia ma tofi o le itumalo i le paeaiga o le 2006 i le 2011, lea e lei toe pale mai i le mae‘a o le palota tele o le 2011. Sa ia lagolagoina le Itu agai i le paeaiga e tasi faapalemene sa tulai mai ai.
