E lei popole le toatele i le faauli mai o timuga ma le loulouā o le tau i le Aso Toonai 30/11/13, sa faataunuuina ai le faamoemoe sailiga seleni a le Ekalesia EFKS a Brisbane i le susuga i le faafeagaiga ia Rev Milo Faaleava o le failautusi foi lea o le Matagaluega EFKS a Kuiniselani faatasi ma le faletua ia Talamasinei Faaleava.
O lea polokalame sa faatinoina ona o le alo atu lea mo le po a o lumanai le Kirisimasi e fia faaaogāina ai ni manu e iai asini, povi, ma ni kamela mo le falemanu sa soifua mai ai Iesu ma nisi lava faagaioiga o lea afiafi.
Na se‘iina ai foi se lulu tele i lea aso auā e lē o faatemutemu le autalavou i tapenaga o le faatinoina o le fanau mai o le pepe fou ma na iu manuia le faamoemoe auā na toatele i latou na maimoaina.
Ua tulimatai le toatele i le afiafi o le Aso Lua 24 o Tesema i se vaaiga uigaese o le a oo i ai le fanua o le ekalesia i se taimi muamua i Perisipeni faatoa vaaia ai ni manu i tala o le Kirisimasi auā o se itu matagofie lea i le au faamuli e lē o malaga, o le iai lea o ni vaega e tafafao i ai i vaitaimi o aso fiafia.
O ni polokalame o lea aso o le a silasila ma molimau i ai pe a pule alofa le Atua e aulia atu i le manuia le aso 24 o Tesema.
Na momoli le agaga faafetai o le susuga i le faafeagaiga Rev Milo ma le faletua ia Talamasinei i le lagolago mai i le sailiga tupe a le Aoga Aso Sa. Ia faamanuia atu le Atua.
O nisi na manumalo i le Xmas Raffle:
1st Prize: Jane & Pu‘ela Patu
2nd Prize: Rev. Asora Faresa
3rd Prize: Linda Vasiti P
