Saili e le Toomaga nisi avanoa mo lumanai o fanau sauaina

E atoa le sefulu tausaga o le faalapotopotoga o le Toomaga mo ē Puapuagatia i le masina o Mati o le tausaga fou. Pe a toe silasila i tua le Pelesetene le faletua o Lina Chang, i le amataga o le faalapotopotoga ma lana tautua, e toulu ona loifofoga ona o le tele o faigata ma fita sa feagai ma ia ma i latou na faavaeina, a o lenei ua telē lona aogā i fanau ma soo se tagata i le atunuu.

“O le mafuaaga lava lena o le faatuina o le Toomaga ona ua matou vaai atu, a leai se faalapotopotoga e tulai atu e fesoasoani i sauaga ma faafitauli o o tatou tagata, ua leiloa la poo ai a sulufai i ai”.

O le Toomaga na afuafua lona faaveina ina ua tele ma anoanoai mataupu ua aafia ai fanau teine ona o le sauaina i faiga tau feusuaiga e lē gata i totonu o le lotoifale o aiga ae faapea foi i solitulafono faapea e tutupu ma aliali mai i isi vaega o le atunuu e pei o totonu o nuu, ofisa ma faalapotopotoga ma pisinisi.

O nisi o fanau teine ua mae‘a a latou mataupu sa fofogaina i le faamasinoga ma ua faia faaiuga i tagata na molia ai. Peitai na faaalia e le pelesetene o le lumanai o nei tamaitai laiti o le isi lea o vaai a le Toomaga ia mafai ona maua e i latou se soifuaga lelei.
O le toa sefulufa o tamaitai ua toe foi i o latou aiga ma ua faia ni feagaiga ma le Toomaga i puipuiga, ma o loo asiasi foi i ai le faalapotopotoga ina ia mautinoa o loo lelei le vaaiga o ia fanau teine ma e lē toe aafia i nisi faiga solitulafono e faia i ai e nisi o o latou aiga poo nisi foi tagata e ese mai ai. “Ioe ua mae‘a ona matou talanoa lelei ma mātua ma sui o aiga ma ave foi i ai le matou tuualalo”.

O nisi o fesoasoani mo nei fanau sauaina ua saili ai foi avanoa sikolasipi e aooga ai i latou i fafo.
O le tausaga nei na tatala ai le aoga o faamoemoega le school of hope, ma ua faaalia e Lina e toatasi ua mae‘a ona faamautu ana aoaoga i Ueligitone ua totogi e se ulugalii agalelei o se faauo a le Toomaga.
“Ou te faafetai i nei tagata ona o le agalelei i sia tamaitai sa matou vaaia ma tausia, ma o le faamoemoega ia maua sona lumanai lelei”. O le tausaga fou foi o le a maua ai avanoa sikolasipi mo nisi tamaitai e toaono o le a aoaoina ai i Niu Sila.

O le faafetai lea a le pelesetene ona o nisi o samaria agalelei ua latou ofo mai e vaaia ma totogi aoaoga mo ia alo tamatai o le atunuu sa sauaina i ni amioga lē lelei a nisi sa faia i ai. E lei faailoaina mai e le pelesetene aoga o le a aooga ai i latou, ae o loo feagai nei Lina ma le faia o o latou pepa malaga ina ia mautu vaega uma a o lei tuua Samoa i se taimi o le amataga o le tausaga fou 2015.
Le Pelesetene o le Toomaga mo ē Puapuagatia le faletua o Lina Chang, ma lana galuega mo fanau ma tagata ua sauaina e 24 itula