Ua alualu tausaga o le polokalame o le Teuila ma le sailia o se Tausala o Samoa e pei ona taualuga iai lea vaiaso faailogaina i Samoa i le vaiaso muamua o Setema o tausaga taitasi a’o lea ua iai se suiga tele i lenei tausaga, o le ave o le tauvaga e saili ai se tausala o le atunuu e talimalo ai le motu o Savaii.
O le vaiaso ua mavae na faalauiloa ai le talimalo o Puleono i le tauvaga lenei o le taualuga o tapenaga o le Teuila i tausaga taitasi.
E le taumate o se tala fiafia mo le asosi o le aufaipisinisi i Savaii o loo atinaeina tagata tafafao poo tulisi aua o le a toatele le atunuu e malaga ma nonofo i auaunaga tau faletalimalo i Salafai ma faaaoga auaunaga eseese o iai.
O le taimi lenei ua tafa ai le finagalo o le Malo aemaise le komiti o le Tausala o Samoa ma ave le tauvaga e faatino i Savaii ma o se fiafiaga lea i le au aipisinisi ma le atunuu o alala i le motu tele i Salafai.
O le tausaga nei e atoa ai le 28 tausaga talu ona faatino le vaiaso o le Teuila ma saili ai se Tausala o Samoa. O se polokalame a le Malo na faavae a’o avea le afioga i le Palemia susuga Tuilaepa L Sailele Malielegaoi ma Minisita o Tagata Tafafao i le lua sefulu fitu tausaga ua mavae. Pe a toe tepa i tua i le amataga o le vaiaso o le Teuila sa tele faitioga na luitauina ai komiti sa tapenaina lea polokalame ona e lei ‘asa se tausaga ma faafitauli.
Ua tele suiga i le faatinoga o polokalame e pei o le tauvaga pese lotu ua le toe tauva ae ua faia o se faaaliga o pesepesega faaleagaga ua valaaulia ai ekalesia eseese. O le sefulu tausaga muamua o le Teuila ma le Tauvaga e saili ai se Tausala o le atunuu sa finau aufaipese i le manumalo ma sa masua mai ai i fafo faitioga i le sola pea o le aufaipese Katoliko a Siusega e aulotu ai le alii palemia ma le manumalo.
E pei o le amataga lea o suiga i lea vaega o polokalame amata o le Teuila ua oo mai ai i aso nei ua le tauva ni aufaipese a ekalesia ae ua na ona faailoa o a latou tapenaga o pese lotu ma ave iai si meaalofa mai le komiti.
