O lea ua taoto mai nei se tasi o itumalo malosi mai le motu tele i Salafai e toatolu ni faipule tamaitai ma ni tamalii se toalua o le a taufetuli i le nofoa o Alataua i Sisifo auā se tofi faipule na te tauavea le sao o le itumalo i totonu o upufai a le atunuu i le Palemene.
Ua manino lelei le mata o le vai i suitauva nei e toalima ua lesitala mo lea itumalo e aofia ai le faipule o loo nofoia nei le nofoa ia Lafaitele Patrick Leiataualesa, Pei Fata Tauiliili, Taatitimanaia Aiolupotea Sooalo Visetoka Peteru, Tuifaiga Loluama Yohsiva ma Aliimalemanu AlofaTuuau.
O le fetalaiga i le tama igoa ia Taatitimanaia poo le Afioga Aiolupotea Maiava Sooalo Visekota Peteru, na tamoe muamua i le isi paeaiga ua mavae i le itumalo o Aana Alofi Numera 1 i lona suafa Maiava, ae o lea ua toe maua lona avanoa e tauva ai i le itumalo o Alataua i Sisifo i lenei faigapalota. O le itumalo muamua lenei ua toatele ai ni faipule tamaitai e tauva ai, talu ona faagasolo faigapalota a le atunuu.
I le sauni ai o le faipule faaolioli ia Aiolupotea Taatitimanaia Visetoka i le faigapalota i lenei tausaga, ua ia savalia ai ala o le mativa, i laufanua o Aukilani e ala i lana sailiga seleni auā lona faamoemoe.
Ua ia faatagisia ai le fesoasoani a alo ma tamafanau o le itumalo o Alataua i Sisifo e lavea ai Falelima, Neiafu ma Tufutafoe, aemaise o aiga uo ma ē masani ina ia latou lagolagoina lona faamoemoe poo le Posiva e faia i le aso 30 o Ianuari i le Hall i Otahuhu Rugby Club i le 11.00am i le taeao, i le tuatusi 8 Awa Street i Otahuhu.
O le upu e masani ai le atunuu, “A e iloa au i Si‘ulepa ou te iloa oe i Togamau.” O le ā lava se foai o le a e tauaaoina o le a talisapaia ma le agaga fiafia ma le faafetai.
