Saili fesoasoani Iuni lakapi faatina a Samoa faaleleia lakapi i Savaii

E tele vaega o loo manaomia ai se fesoasoani mo kalapu ma iuni lakapi faaitumalo i Savaii e faaleleia ai le atinae o le lakapi i le motu tele poo Puleono i Salafai.

Na molimauina lea tulaga i le uluai asiasiga a le Ofisa sili o le iuni lakapi aoao a Samoa, le susuga Fred Amoa sa ia asia ai le iuni lakapi faaitumalo a le Itu o Tane.

“E tele vaega e manaomia ai le fesoasoani ma e talosagaina ai lava le agalelei o kalapu lakapi i fafo atu o Samoa aemaise lava o Niu Sila ma Ausetalia”.

Faaalia foi e le Ofisa sili o vaega lava e manaomia ai ni fesoasoani o totoga eseese mo le faatinoga o le lakapi e pei o polo, togiga, totoga mo togafitiga o le faia o le fesoasoani muamua pe a aafia ni tama taaalo i ni manu‘aga, aemaise o fagu vai mo tama taaalo.

O le tasi vaega tāua e manaomia ai se fesoasoani o le aoaoina lelei o faiaoga poo coach, ma o se vaega o loo fesoasoani i ai le iuni lakapi faatina a le atunuu i le tulaga o le atinaeina o le taaloga, peitai e le o tu‘ia ai nisi ua iai le agavaa ma le tomai e mafai ona faaaogā lo latou taimi mo lea vaega tāua.

O le lelei faatino o le lakapi i kalapu ma iuni faaitumalo i Savaii ua maualuga e pei ona faaalia e le Ofisa sili, ae e soo se mea lava e manaomia le siitia pea o le lelei e ao lava ona aoaoina pea ina ia sili atu se isi tulaga.

E iai le talitonuga o se taimi muamua lea ua faia ai se asiasiga a se Ofisa sili o le iuni lakapi i le fia sailia o manaoga o iuni faaitumalo ma kalapu lakapi.

Faaalia e Fred Amoa o lana lea vaai i le atinaeina o le taaloga, ia iai ma se tulaga e asiasia ai iuni ma kalapu ma faatalatalanoa i ni vaega e manaomia ai se fesoasoani a le iuni faatina.

O tupe mai le pulega o le lakapi a le lalolagi le IRB e le o lava lea mo le unaia o polokalame e faaleleia ai le taaloga, o le isi lea mafuaaga o le tatalo o le Ofisa sili i le lautele o Samoa o alala i fafo e aumai le latou lagolago i ni fesoasoani.

O loo fuafua e toe asiasia e le Ofisa sili isi vaega o Savaii i iuni faaitumalo ma kalapu i le faamoemoe lava e saili manaoga o loo iai i le atinaeina o le taaloga lakapi.

Fai mai le Ofisa sili o le isi itu tāua o lana asiasiga ona e ui e faapea o loo maualuga le lelei o le lakapi mai le motu tele, ae e pei lava o loo tele ina pogisa le vaai i ai i le tele o taimi pe a oo i le itu i le atinaega o le lakapi.

“O Upolu o loo lelei auā e pei o Apia lea e tapuvae tasi i ai gaioiga uma o le pulega o le taaloga, ae e palasi atu loa ia Salafai ona iai lea o nai vaega na e lē o sagatonu ma lelei ai”.