Ua tele ma felanulanuai vaega o mafatiaga ua agai iai le galuega ale faalapotopotoga ole Toomaga mo ē Puapuagatia. O lea ua latou faatāua mafatiaga o tina oloo nonofo maupaolo i aiga o latou taitoalua ma ua maua ai se isi polokalame latou te faatino, ole mafuaaga lea ole latou talosaga ile lala o Malo Aufaatasi le UNDP mo se tupe.
Na saunoa le alii Palemia ile faalauiloaina ole polokalame nofotane ale Toomaga ma ia faaalia ai, e tasi lava le auga ole sauniga ua valaaulia ai nisi o sui auai, ole samiga ole $200 afe ale Toomaga mai Malo Aufaatasi.
Na saunoa ai le Palemia susuga Tuilaepa L Sailele Malielegaoi ma ia faailoa ole vaega lea ole soifuaga faasamoa e ese le matautia o ona faigata sa ia vaaia i lo latou nuu i tausaga e tele ua mavae. “A nofo le teine ole nuu ise tama ole nuu e feololo, ae a nofo loa se tama ole nuu ise teine ose isi nuu e matuā aasa lava vaaiga auā ole soifuaga lena sa tatou iai i na aso”. Ole taimi nei na faaalia e Tuilaepa e moni lava oloo iai pea faiga masani faasamoa i mea nei o tina nofotane ae e lē o toe tutusa.
Ole tina o Sesilia Misa ose maupaolo oloo auai ile polokalame lenei ale Toomaga na ia tautino i tusitala e lē o toe ta‘ua o ia ose nofotane ile nuu o lona toalua ae ua ta‘u ole teine ole nuu, ole mafuaaga foi lea ua faatuatuaina ai o ia e taitai i nisi o atinae ma galuegafai a tina ole nuu o Salelesi.
“O la‘u galuega e lē faigofie auā ua iloa lelei ele tina nofotane vaega e lē tatau ona oo iai lona malosi, ae o la‘u faatautaiga o tina ma tamaitai ole nuu, e matou te ta‘ua teine ole nuu o tamaitai, ae ole au maupaolo e ta‘u o teine, o lena faiga ua matuā talia lelei lava e tina ole matou nuu ma ua lē toe aliali mai ai lava ni faafitauli e pei ona sa iai muamua”.
E lei faailoaina e Sesilia poo ā faafitauli ae e iai le talitonuga o faafitauli ole tutuli o tina maupaolo i tua e fai mai gasesega ma isi tiute ae tapuai ile fale tina ole nuu. E lē fou ia faiga auā oloo molimauina ma vaaia ile tele o nuu ma afioaga ole atunuu. Peitai ole itu tāua lea ile polokalame ale Toomaga e pei ona faaalia ele Peresetene le susuga Siliniu Lina Chang, e lē o taumafai le polokalame e titina tu ma aga masani ale atunuu, ae ole auga o aute ile polokalame ia siitia le soifuaga o tina nofotane ise isi tulaga i totonu o nuu oloo alala ma nonofo ai. “Atonu ose itu sili lea ona tāua ile polokalame ia aua ne‘i manatu le toatele a mea ua matou taumafai e faasili tina nofotane, e leai oloo taumafai e fesoasoani e siitia lo latou tulaga tau tamaoaiga ini atinae lelei latou te faia”.
