Oloo lelei tapenapenaga ale ‘au taitoafitu a Tamaitai ale atunuu a‘o sauni atu e sailia so latou avanoa mole Olimipeka i Rio de Janeiro, ina ua manumalo i taaloga tapena ma ‘au a kalapu a Egelani. Ole faaiuga ole vaiaso nei na manumalo ai le Manu Sina i ana taaloga e lua lea na taaalo ai ma le ‘au a tamaitai a Yorkshire. Na manumalo le Manu Sina i ‘ai e 19-15, a‘o le taaloga lona lua na manumalo ai i ‘ai e 29-30.
O lea saunia ai mole taamilosaga i Aialani ile faaiuga ole vaiaso nei, 25-29 Iuni. Ua tuu atoa iai le faamoemoe ole Manu Sina ole a saili so latou avanoa e avea ai latou ma sui o Samoa ile Olimipeka, ina ua lē manuia le taumafaiga ale Manu Samoa Sevens i Monaco.
E sefulumaleono ‘au ole a tauva ile taamilosaga, ole a tausinio mole avanoa e tasi oloo totoe. E lua ‘au mai le Pasefika ole a tauva. Ole Atu Kuki le isi ‘au male Manu Sina auā o Fitu ua maua lona avanoa ile Olimipeka. O isi ‘au e mai Asia, Aferika, Europa ma Amerika.
Ile taaloga muamua ole a fetaui ai le Manu Sina male aufili a Rusia, ma Zimbabwe ma Madagascar. Ole a taatia ia Zimbabwe ma Matakasa, a‘o le ‘au a Rusia ole ‘au numera tasi lea i faatulagaina o ‘au ole taamilosaga i Aielani. O Samoa e numera lua ile faatulagana.
E tailua ‘au e mai pulu taitasi e sao atu ile kuata faaiu. O lona uiga e ao ona toe fetaui Samoa ma Rusia ile taaloga faaiu ole taaloga mole avanoa ile Olimipeka.
Ile saunoaga ale Taitaifono ale Lakapi ale Lalolagi, Bernard Lapasset na ia ta‘ua ai le tāua tele o lenei taamilosaga mole taaloga Fitu a Tamaitai, “Ole taamilosaga i Dublin, Ireland e aogā tele lea ile tapenaina o ‘au uma mole Olimipeka.”
“E maoae le avanoa ole a maua ele ‘au e tasi, e au ai ile taaloga tele ale Lalolagi.”
“E foliga mai o Rusia e lelei tele lana taalo ae oloo alu foi i luga le lelei o Sepania. Aua foi ne‘i galo Aielani auā o lea e fai ile latou atunuu le taamilosaga.”
“Ae e matuā lē iloa lava poo ai le ‘au ole a sao, auā e matuā lelei uma lava ‘au e sefulumaleono.”
Ole taitai ole taamilosaga o Garrett Tubridy na ia ta‘ua e faapea, “Ole taamilosaga lelei tele lenei mose avanoa mo Aielani e matamata ai i taaloga ale Olimipeka.”
Pulu A: Rusia, Samoa, Zimbabwe, Madagascar
Pulu E: Sepania, Mexico, Venezuella, Tunisia
Pulu I: Aielani, Saina, Potukale, Trinidad Tobacco
Pulu O: Hong Kong, Argentina, Kazakhstan Atu Kuki
A‘o ‘au nei e sefulumaletasi ua maua avanoa e sao atu i Rio, e iai: Brazil, Ausetalia, Kanata, Peretania, Niu Sila, Columbia, Amerika, Falani, Kenya, Fiti ma Iapani.
O le ‘au lenei a le Manu Sina
Ana-Maria Afuie Falefa (Solosolo, Vailele, mai Perisipeni)
Ann Helen Rasmussen (Vaiala, Tufuiopa, mai Aukilani)
Apaula Kerisiano (Saanapu, Apia)
Bella Milo (Solosolo, Hong Kong)
Brenda Collins (Leufisa, Pata, Falelatai, mai Ueligitone)
Helen Collins (Leufisa, Pata, Falelatai, mai Ueligitone
Cesca Luafalealo (Lepa, Luatuanuu, mai Aukilani)
Keilamarita Pouri-Lane (Malie, Fagalii, mai Kalaiesetete)
Maitua Feterika (Solosolo, mai Aukilani)
Masuisuimatamaalii Pauaraisa (Foailalo, mai Kalaiesetete)
Sieni Mose (Vaiala, Solosolo, mai Aukilani)
Vaanessa Molia-Fraser (Nofoalii, mai Aukilani)
Faiaoga – Ramsey Tomokino: (Saina, Tuanai, Falealili)
Taitaimalaga – Nicholas Bakulich (Vaovai, Fogatuli)
Faiaoga o toleniga – Kyle Nuualiitia (Falefa, Falevao)
