Saili auala faataitai e avanoa tutusa ai alii ma tamaitai

O le tasi lea o mataupu ua faafagogo tagiao i le faafofoga a lo tatou atunuu, o avanoa tutusa e maua e alii ma tamaitai i soo se atina‘e poo galuegafai aemaise o tulaga tofi i le saofaiga i upufai o Malo, totonu o galuega a le Malo ma faalapotopotoga tuma‘oti ae faapea foi i le saofaiga a nuu ma afioaga o loo pulea e alii ma faipule.
O se mataupu e tāua i taiala o pulegamalo faatemokarasi o loo lima taitaiina ai ma pulegamalo a Samoa. O le ala foi lea o le naunau o le Malo e pei ona saunoa le minisita o le matagaluega o Tina ma Tamaitai le tofa Tolofuaivalelei Falemoe Leiataua i le tatalaina o le vaega amata o mafutaga faaleaoaoga ua faatupe e le UNDP ae taulamua lea matagaluega a le Malo i le unaia ma faalautele atu mo le silafia e le atunuu.
O lea mafutaga sa usuia i le nofoaga o le Tofa Mamao i Leauvaa sa lautogia ai sui sinia o le autusitala ma le aufaasalalau, o sui sinia mai Matagaluega ma Faalapotopotoga a le Malo, o faalapotopotoga tuma‘oti ma auaunaga e pei o pisinisi. O le sini o le faamoemoe ia saili ni auala e mafai ona maua ai avanoa tutusa e alii ma tamaitai. E faatupu manatu ai le lauga a le susuga i le faafeagaiga na taitaia le sauniga, le susuga Siaosi Salasulu o le EFKS a le afioaga o Vailele.
Saunoa le faafeagaiga i lana upu timai, o ia sa ola a‘e ma aoaoina i Niu Sila ma o ia o se tagata e malosi ona mātua i le lotu kerisiano. O lana mau o le pitolaau o loo tauave e le itupa o alii i le laugaina o le upu ma avea ma faifeau, e tatau ai foi ona avanoa i ai le itupa o tamaitai.
O lana molimau e fia vaai i se taimi o le a faataunuu ai lea avanoa i le ekalesia i Samoa.
O se mau ua luitauina ai i latou o faauluulu i ai ekalesia eseese aemaise lava ekalesia o loo mamalu ai le na o alii e mafai ona faauu ma avea ma faifeau. O se vaega amata lea o le mafutaga sa faatupu manatu i sui auai a o lei amatalia le latou mafutaga.
I le saunoaga a le minisita o le matagaluega o Tina ma tamaitai na ia tolaulau ai nisi o faiga faavae a le Malo ua ave ai le avanoa tutusa i tamaitai ma alii e pei ona faatuina ai le matagaluega o loo ia vaaia atoa ai ma le talia e Samoa o le feagaiga e tafiesea ai soo se faiga faailoga tagata i tina ma tamaitai. O faaiuga i le filifilia o nisi o tamaitai o le atunuu e taiulu i galuega eseese a le Malo o le tasi lea o molimau ola o le ave o le faamuamua a le Malo i le avanoa tutusa o alii ma tamaitai.
I totonu o upufai o Malo o lea ua pasia e le Palemene le siitia o le numera o tamaitai e umia tofi faipule mo itumalo o le atunuu ma o le siitia ai foi lea o le sao ma le siufofoga o tamaitai i tonufai o le Malo ma le atunuu.
Peitai o le naunautaiga o le UNDP o se tasi o lala o le faalapotopotoga tele o Malo Aufaatasi, ia saili mai le silafia o tagata ua mau tulaga i vaega eseese e saga unaia ai lenei mau tauave, ma o se itu e tāua ai tele le fefaasoaa‘i o silafia. E fā aso sa faagasolo ai lea mafutaga, ma o le masina fou e toe tauaofia ai lea aoaoga ma e faia lava i le Tofa Mamao le nofoaga o le Ekalesia Katoliko i Leauvaa.