Talu lava ona pasia e le Palemene le tulafono e faamalosia ai le laisene o taifau a le atunuu faapea ma aiaiga ua iai mo le taofia o le taaloa o nei meaola aemaise aiaiga e tinou ai aiga ma tagata o iai taifau e tausi lelei ma taofia ai foi le soona tele vale o ni taifau, ae lē mafai ona faatonutonu le taaloa, e lei faamalosia lava. O le Matagaluega o leoleo ma falepuipui o loo tuu i ai le faatinoga o lenei tulafono i le laisene ma le vaaia o aiga ma tagata e lē usitaia ona molia lea.
O le mafuaaga lea o le sailiili pea o le matagaluega o leoleo ma le Malo i ni faiga lelei ma talafeagai e faamalosia ai lea tulafono. O nisi ua iai le tomai ma le poto i auala e faatonutonu ai le faatupulaia o taifau taaloa mai Niu Sila sa fono ma nisi o leoleo sinia e pei o afioga i Komesina lagolago le susuga Afamasaga Micahael Soonalole, ma Nafoi Talaimanu Keti. O lea fonotaga sa agai tonu lava i le tulafono ua ta‘ua o le Canine Control Act 2013.
Ua faaalia i le mae‘a o lea faatasiga le maualuga tele o le numera o tagata e aafia i ni manu‘aga ona o osofaiga a taifau a aiga ma taifau taaloa solo, aemaise o le maualuga o faaseā e faasino i le faatalutaluā o leo o nei meaola e lepeti ai le filemu o malologa a tagata.
Ua tatou iloa lelei o le tatou atunuu e taaloa taifau a oo ina vevela taulalaga a nei meaola e faatalutaluā solo i soo se vaega o fanua o loo nonofo ai tagata ma aiga i se nuu. E faapena foi i vaega eseese o le taulaga o Apia o loo vaaia ai nei meaola. Tasi lea o faafitauli ua faamauina le tele ai o faaseā.
O le tausaga e 2012 na faamauina e le falemai o Tupua Tamasese Meaole le oo atu i le 263 o gasegase na avatu ona o manu‘a e mafua i osofaiga a ni taifau.
Peitai e talitonu le matagaluega o leoleo ma sui na malaga mai Niu Sila e faasefuluina le tele atu o ni tulaga faapenei ona e lē o maua faamaumauga mai falemai i tua faapea tagata e ‘ai e taifau ma togafiti lava i tua e lē o i se falemai.
O se isi lea o tāua o le tulafono o loo tau saili ni auala e faamalosia ai ona o le tele o tausaga o feagai Samoa ma le faateleina o taifau, ae leai se faiga e faatonutonu lelei ai, ua lamatia ai foi le saogalemu o tagata savavali ma i latou e tietie uila vilivae.
Ua silasila ai nei le matagaluega o leoleo ma i latou mai Niu Sila e faatino ni tala‘iga faalauiloa e faaaogā ai auala o fesootaiga i leitio, televise ma nusipepa. O le a silasila foi i se faiga e faatino ai ni togafitiga mo nei meaola ina ia taofia le fanafanau ma faatetele ai pea le numera o taifau taaloa solo.
O faamaumauga i se suesuega i le atinae o tagata tafafao na iloa ai o manatu faaalia o tulisi e 4,404 e mamafa ma fulisia i le lē fiafia i le tele o taifau taaloa. O se isi lea o itu lelei i taumafaiga o lenei atinae ma ua mafua ai foi ona fausia e le Malo le tulafono e faatonutonu ai le tausia ma le vaaia lelei o nei meaola. O le naunautaiga o le matagaluega ma le Malo ia mafai ona faataoto se taiala lelei ia umi tausaga o lima taitaiina ai le faamalosia o le tulafono ina ia lelei ma aogā mo le atunuu atoa.
