Ua faagasolo aoaoga ua faatautaia e le Ofisa o Faigapalota i Samoa auā le toe faamanatu ma faamanino lelei tiute o le mamalu o le atunuu o le a feagai ma galuega o le vaaia lea o le faagasologa o le faiga filifiliga a Samoa i lana faigapalota tele lea ua loma nei i le 2016.
E toatele ua manatu atonu o loo telē le taimi e faatino ai lea galuega peitai e lē o nofonofo le Komisi ona o le manatu e tatau lava ona vave le lesitala, aua ne‘i faatali i le tumutumu ma le faatatope o le taimi mulimuli ma ia mautu i latou uma lava o le a galulue mo le Ofisa o Faigapalota i le vaitaimi lea o le faiga filifiliga a le atunuu e ala i faigapalota.
O se palota ese lea o le a alo atu i ai Samoa auā ua tele lava suiga o le a vaaia, e lē gata i le lola palota ae faapea foi le unai mo tamaitai ia faaopoopo lo latou numera i totonu o le Palemene.
O le mafuaaga foi lea o le faafetaia e le Komesina o Faigapalota, Susuga Papalii Malotau Malietoa, o avanoa ua mafai ai ona avea ma sui o Samoa i le molimauina o palota ua faagasolo nei a isi atunuu o le Pasefika.
O lea ua malaga atu le susuga Papalii Malotau Malietoa i le Atu Solomona. O ia o se tasi o sui o se aumalaga faapitoa a le Fono a Malo o le Pasefika (Pacific Island Forum) ua valaaulia e le Malo o le Atu Solomona e molimauina le faatinoga o lana faigapalota tele lea e faatautaia i le vaiaso lenei ma e faamautu le faitauga mulimuli i le faaiuga o le masina nei.
O le unai foi ua faia e le Atu Solomona ina ia faaopoopo le numera o tamaitai i lana foi Palemene o se tasi lea o itu tāua o le a matauina e le Komesina o Faigapalota a Samoa a o iai i lea atunuu.
O le itu lea o le unaiga o le numera o tamaitai e avea ma sui faipule o le Palemene o se taumafaiga lea na laualuga i manulauti o le Meleniuma a Malo Aufaatasi, ma o malo o le Pasefika lea e vaaia ai le laitiiti o le numera o tamaitai ua avea ma faipule i o latou Palemene.
Mo Samoa lava ia e na o le toalua lava o loo i totonu o le Palemene i le taimi lenei ma ua iai nei teuteuga o le tulafono ua pasia e Samoa ina ia mautinoa e lē i lalo ifo o le lima pasene o ona sui a faipule o tamaitai.
Ua tele foi finauga i lenei mataupu ae o lea ua pasia le teuteuga ma o se faamalosiau tele lea i tamaitai o le atunuu aemaise le taumafaiga ua unai e le Ofisa o Faigapalota ma le lālā o Malo Aufaatasi ua patino i le atinae o tamaitai le UN Women.
O le aotelega o le valaaulia i le Atu Solomona, ina ia mafai ona vaavaai poo ā auala o faamaoni ai le faigapalota, pe faamata o iai ni auala e manatu le aumalaga faapitoa lenei e lape ai le faatinoga o le faigapalota a lea atunuu.
O le faamoemoe foi i lenei vaiaso ina ia filemu le faiga filifiliga a lea atunuu o le Pasefika ma ia manino ma malamalama tagata uma i le palota.
O le a maua le avanoa o lenei aumalaga e aofia ai le Susuga Papalii Malotau Malietoa e faatalatalanoa ai tagata o le Malo ma sui o Faalapotopotoga tuma‘oti i galuega ua faatino e le malo o le Atu Solomona e faatino ai lenei faiga filifiliga ma e silia i le to‘a 100 tagata mai i fafo o le a iai i totonu o lea atunuu i le taimi o lana faigapalota tele.
4
