E sefulu vaega tetele ua lima taitaiina ai le Taiala mo le Atinae o Samoa mai le tausaga lenei ole a mae‘a 2016 e oo ile tausaga e 2020.
Ua manino ile taiala e lē o alo tama le Malo ile unaia ole atinae ina ia maua e tagata faamanuiaga. Ise isi faaupuga e lē o manao le Malo e toso isi ae afisi isi i lana fuafuaga.
Ile fesiligia ole afioga ile Minisita o Tupe le afioga Sili Epa Tuioti, na ia saunoa ai ose taiala e ao ona tutufaatasi ai itutino tāua uma ole atunuu mai le Malo e oo i faalapotopotoga tumaoti, o pisinisi ma le pulega a nuu ma afioaga faapea ekalesia e faatino lo latou sao mo le ausia o faiga faavae ole taiala.
“Ose taiala oloo tusitusia ai le sootaga ale malo ma tagata uma o Samoa, ma ole malosi la o lenei sootaga faapaaga ole tele foi lea o vaega e mafaia ona ausia”.
Na saunoa foi le Minisita ole taiala ole atinae ua mae‘a sa autu ile siitia ole soifuaga manuia mo tagata uma ma ua toe faaauau lenei autu mo le isi fā tausaga.
Ua faaopoopo ile autu lea ma faaupuga ole unaia atinae ma faatupulaia avanoa mo tagata uma, “Ole manaoga ia te‘i matou ia faatino vaega uma matou te mafaia ina ia mautinoa le manuia ai o tagata uma.
Matou te mananao foi ia mautinoa oloo iai uma tagata e aofia ai ma i latou oloo ma‘ale‘ale le soifuaga ina ia manuia tutusa i lenei taiala”.
Ua silasila le Malo e unaia faiga faapisinisi ma tagata faipisinisi i fafo atu o Samoa ma ia aumai e faagaioia a latou pisinisi ile atunuu. Ose tasi lea o vaega sili ona naunau le Malo e faaleleia o avanoa faigaluega e maua auā oloo taulai le silasila ile tapunia ole Yasaki ise taimi le tausaga fou.
Ose kamupani sili ona toatele tagata oloo faafaigaluegaina ma na faaalia ele Minisita o Tupe, e lē o nofoa‘i le Malo ile vaavaai ise tulaga e faatumau ai tulaga lelei o tupe maua oloo maua mai ile Yasaki, ae na tautino foi le minisita, atonu ole a iai ni tulaga faaletonu i tupe maua pe a tapunia le kamupani, ae atonu ole a mo se vaitaimi auā e tatau ona oo atu i lena taimi ua iai se fuafuaga mautu ua faataoto ele Malo mo le maua pea oni avanoa faigaluega se tele mo tagata ole atunuu aemaise lava ia i latou e mae‘a mai aoaoga ae ua iai ni kamupani ma ni pisinisi tetele e maua ai galuega.
