E tasi lava le ‘ai poo le ‘olo na manumalo ai le aukilikiti a Niu Sila le Black Caps ia Ausetalia 152/9(23.1) i le faaiuga o le vaiaso na tea nei. O lenei taaloga mataina o se avanoa ua maimoa ai e le lalolagi le fefeu ma le finau o le Ipu o le lalolagi o le kirikiti o loo faagasolo nei i Ausetalia.
E ui o le mataina o le toe taumafai atu a Ausetalia ia Mitchell Starc lea na foliga ua toe ola mai ai Ausetalia, ae na finau pea le Black Caps ma iu ai lava ina maua le toe avanoa o Kane Williamson o Niu Sila mo le ta manumalo ae toe tasi le ‘olo o totoe.
O lenei manumalo mataina ua suia ai foi le gasologa o le Ipu o le lalolagi ma ua avea ai Niu Sila ma ‘au tomua (favourites). E lei faiaina foi le Black Caps ma ua pito i luga nei o lana pulu lea e aofia ai ma Afghanistan faapea Bangladesh.
O le pulu B a Ausetalia o loo iai West Indies, Pakistan, Ireland ma Zimbabwe ma e foliga mai o Niu Sila e ono fetaui ma Aferika i Saute i le taaloga o le kuata siamupini. O le isi auala e lē taunuu ai na fetaui nei aumalolosi i le 1/4 final o le manumalo o Initia ia West Indies.
Ae afai lava e taunuu na fetaui nei au malolosi o lona uiga o le aso 24 o Mati o le a iloilo ai ma ono maua i foi ma se ata o se isi e ono manumalo i le tauvaga aoao. Ua atili ai foi le maualuga o viiga o le manumalo a Niu Sila ina ua saunoa le alii kirikiti iloga a Ausetalia ia Shane Warne, “O le au lenei a Niu Sila o se au mataina i le Ipu o le Lalolagi” o loo faagasolo nei.
