O le finagalo o le Atua e pei ona ta‘ua mai i le Kenese 2:24 e faapea, “O le mea lea e tuua ai e le tane lona tamā ma lona tina, ae faatasi ma lana avā; ona avea ai lea o i laua ma tino e tasi.”
O le Aso Toonai, aso 26 o Oketopa na tuufaatasia ai le susuga ia John Suafa‘i Semau ma lana manamea ia Gladys Hellen Masoe Semau. O mātua o le tamaitai faaipoipo, o Faavaoa Vaafusuaga Masoe (Saasaai) ma Starling Masoe (Asau).
O mātua o le alii faaipoipo, o le tamā ia Esoto Semau (Saleaula) ma le tina ia Leata Semau (Satapuala).
Sa faapaiaina i le ekalesia Worship Centre e le susuga i le faafeagaiga ia Ps Anthony Mauinatu sa faataunuuina le sauniga i le malumalu EFKS Southwest Brisbane le susuga i le toeaina ia Rev Taua‘aga & Senerita Mata‘afa.
O le tofa ia Maarona Utumapu sa fai ma fofoga o le aso; o faaaloaloga sa feagai ma le tofa ia Ofagamalefā Tipi Tisema ae o Sauago sa feagai ma le faafetai mai le auvalaaulia. Sa fiafia tagata uma i musika mālie a le faaili a le One Sound, le susuga ia Erik Pepe ma le vaega.
Na foi le gogo ma si ana i‘a ona o le lava saunia o le taumafataga a le Uncle Sam’s Take Away, le tofa ia Poulava Sam ma Lona Matautia, o loo lagolagoina alaleo, ma o se tasi o tautua ua loa lana auauna i le mamalu o le atunuu i Brisbane ma isi setete o Ausetalia faapea Samoa.
