O le fuaitau ua faaulutalaina ai e faapea, “Ua ou tau le taua ma ua ou manumalo ai!” o le tāua lea o lenei laasaga ua ausia, aemaise foi ona o se matatia lea ua faamauina ma molimauina e tusa ma le soifua sailiili ma le naunau tauivi o le Susuga i le Faafeagaia poo le Tofa ia Faleilua Salamasina Tim Toilolo.
Auā o lele ua foi mai le tuligati‘a, ua a‘e manuia mai foi le faiva o sa Sa‘umani, o lele ua laei nei Pastor Salamasina i se isi foi o faamanuiaga e tusa ma lana seuga, ua faauuina ai nei o ia e avea ma loia ina ua mae‘a ma ua tau lau o lona faamoemoe, ma ua na umia ai le tusipasi o lona agavaa ma lona tomai faaloia.
I le faagasologa o le faauuga a le Iunivesite o Aukilani i le vaiaso i ona tua atu, sa lotolotoi ai foi le toatele o alo ma tamafanau o si o tatou atunuu pele o Samoa, ina ua faaeaina ma faamanuiaina ai a latou taumafaiga i ni faailoga eseese e tusa ma le taumafaiga a le tagata lava ia. I lea lava la sauniga sa lotolotoi ai ma le susuga ia Pastor Salamasina Faleilua Tim Toilolo lea ua faauuina ma faamanuiaina i lona tofi faaloia.
O le po o le Aso Lulu na faatumulia ai le fale‘aiga o le Happy Days i le paia ma le mamalu o le valaaulia i Susuga i Faafeagaiga ma o latou faletua mai Ekalesia eseese, o uo ma aumea mamae aemaise o le Ekalesia a le susuga ia Salamasina ma lona faletua, afioga Fepuleai Lagi Toilolo, aemaise o aiga uma na mafai ona auai atu ma molimauina ai le alofa ma le agalelei o le Atua e ala i ana faamanuiaga e pei ona ua ausia ai e le susuga i le faafeagaiga.
Sa muamua lava ona faafoi mea i Matautusa i le sauniga-lotu na taitaia e le susuga i le faafeagaiga, Susuga Mao Lamositele o le Samoan Assemblies of God NZ Incorporated. O le afioga ia Leota Leuluaialii Ituau Ale (former Samoa Parliament Speaker) sa fai ma fofoga o le po na faafeiloaia le paia ma le mamalu o le aufaigaluega a le Atua ma o latou faletua, aemaise foi o le auvalaaulia uma.
O se mafutaga matagofie tele auā sa auai atu i ai nisi o sui o le Pacific Collective, susuga ia Tuilagi Saipele Esera, Sooalo Setu Mua ma Teleiai Edwin Puni, sa faapena foi ona lava ma auai mai nisi o faafeagaiga mai Ueligitone aemaise lava foi o uo ma aumea mamae a le susuga ia Salamasina ma lona faletua.
O le taimi nei la ua faaaogāina nei e le Atua Salamasina Faleilua e ala i lona valaauina faafaifeau (Church Pastor), o ia o se auauana faasuetusi (Certified Chartered Accountant), ma o loo iai nei lona ofisa i le taulaga faatau o Manurewa, o iai foi nisi o ona tofi ma tiute o loo faaaogāina ai lona soifua auauna mo tagata lautele aemaise lava mo o tatou tagata (Samoa Community) e pei o le faalauiloaina ma le faaaogāina o le polokalame o le soifua maloloina lelei (Herbal Life) aemaise foi o lona tofi i le faaee atu i ai o le suafa matai ua faapaleina ai ia e ona aiga.
O lona uiga o le susuga ia Pastor Salamasina o se toa tauivi ma filigā, o ia o se tautai maelega ma le mataala. I lea mafutaga sa lagonaina ai le leo o le fiafia, o le faamanū ma le faafetai tele i le Atua ona o lenei auauna sogasoga, ua avea foi lona tulai mai i lea po ma faamalosiau i mātua aemaise lava o alo ma fanau sa mafai ona auai atu e molimauina le fua mai o le tiga i suesuega ma sailiiliga o le mafaufau ina ua tau lau o le faamoemoe ma ua faaeaina ai nei ma ua a‘e malo ai lona faiva ma lana seuga.
Na saunoa le susuga Pastor Salamasina e lei faigofie lona taumafai, a o le tautai o lona faamoemoe ua taunuu manuia ai, o le Atua lava e toatasi, faatasi ai ma le lagolagosua malosi a si ona faletua ia Fepuleai Lagi aemaise foi o nai ona alo ma nai o la aiga, o le auga lea o lona malosi na fai ma tapasā o ana taumafaiga.
O lana faamalosi i alo ma fanau i lea po, e leai se mea e lē mafaia e soo se tasi pe a finagalo i ai le Atua, faatasi ai ma le faatuatua i le Atua e mafaia ai mea lelei uma.
Ia Pastor Salamasina, faamalo fai o le faiva, faamalo le onosai. Faafetai le faaea aiga, nuu, ekalesia ma le atunuu. Auā a uma ona e faia o se mea ua matuā lelei, ona e faapea ane lea. Ia matuā viia ma faamanūina le Suafa Paia o le Atua ma faatumauina lona viiga e faavavau.
Ia sagai ane ‘ai o le alofa tunoa o le Atua e saga faatupulaia ai pea lou soifua finau e tautuaina ai le feau ma le galuega mo le Atua ma lona finagalo.
Ia saga faaaogāina foi e le Atua lou tomai ma lou agavaa ua iai nei e tautuaina ai soo se tagata e fia maua se fesoasoani e tusa ma lou tofi faaloia ua iai. Ia manuia tele le lumanai ma ona laasaga uma.
Alofaaga ma faamanuiaga na mo oe mai lau Ekalesia, o nai au uo ma aumea mamae uma, o nai ou aiga uma ma tuaa ua fai i lagi le folauga, ae faasilisili alofaaga o lou faletua, lau manamea ia Fepuleai Lagi ma nai o oulua alo. Viia le Atua FAAFETAI.
