Ua sauni le susuga ile faifeau o Kerita Reupena ma lana loia le afioga Leulua‘ialii Olinda Woodroffe, e tuuina atu ile faamasinoga ni molimau fou ua taulimaina ua finauina ai sa lē tatau ona faia ele afioga ile Faamasino Sili le suesueina ole tagi a Kerita sa tuua‘ia ai sui ole Fono Faatonu ale ekalesia na faia le faaiuga e faamalolo ona tofi toeaina male toeaina faatonu ole Matagaluega a Perisipeni (Birsbane) i Ausetalia.
Ua faaalia ini pepa o faamaumauga ua taulimaina se molimau tauto ua mae‘a ona tusitusia ale susuga Kerita ua tuuina atu ile faamasinoga faatasi ai ma lana talosaga ua faaulu e ala mai i lana loia, ina ia toe suesueina le faaiuga ale faamasinoga ua togi mai ai i fafo ma lē talia ele faamasino sili le talosaga mose avanoa e toe suesueina atoa ai lana tagi faasaga ile faaiuga ale komiti faatonu.
E pei ona sa lipotia ise tasi o lomiga talu ai nei ale Samoa Times, le faaiuga tusitusia ale faamasinoga ua soloia ma faaleaogaina ai tuua‘iga a Kerita faasaga i sui ole komiti faatonu male komiti ale autoeaina.
Ua faaalia i pepa o faamaumauga ua taulimaina, oloo iai se aitalafu ale pisinisi ale faletua ole faamasino sili ole “Le Tiara” ile ekalesia EFKS, e ana le fogafaleono ole Ioane Viliamu i Tamaligi sa faagaioia ai le pisinisi. E $71,901 le aofaiga atoa o lea aitalafu ole lisi ole vaega ole maota ole Ioane Viliamu sa faagaioia ai le pisinisi.
Ona o lea molimau ua maua e Kerita ma lana loia ua mafua ai le finauga ua faavae ile talosaga fou ua tuuina atu ile faamasinoga, sa lē tatau ona seei ma nofoia ele faamasino sili le suesueina o lana mataupu.
Ole pogai lea ole toe talosaga ile faamasinoga e toe suesueina le mataupu atoa i luma ose isi faamasino. Ua ta‘ua foi ile pepa o faamaumauga ua taulimaina, sa tatau ile faamasino sili ona faailoa sona aafiaga poo le conflict of interest ona ole aitalafu e pei ona ta‘ua. Faaalia ele tamaitai loia le afioga Leulua‘ialii Olinda sa tuuina atu le talosaga lenei ise tasi o tauaofiaga talu ai nei ale faamasinoga, lea na faia ai le faaiuga ale faamasino sili e faaleaoga ma soloia ona ole a fofogaina le apili a Kerita ma avanoa ai ona tuuina atu ni molimau fou faasino ile mataupu oloo finauina ele faifeau. Faaalia ele tamaitai loia, e lē ole tulaga lea oloo manao iai.
“E tatau lava ona valaau ese le talosaga mole toe valaauina atoa ole mataupu ma suesue molimau, ae ese lava le apili ile faaiuga ua taoto ai le mataupu”. Ose tasi o vaega o mau fou ole a tuuina atu ele faifeau o Kerita ma lana loia e lagolago ai le talosaga mole toe suesueina atoa ole mataupu, ona ua faaalia ile molimau tauto tusitusia ale faifeau, e sese ma lē sa‘o nisi o molimau na tuuina atu ele ekalesia e ala i nisi o faifeau.
O molimau tauto a faifeau o Lauie Lupematasila ma Kerisiano Soti na faatoa tuuina atu ile tamaitai loia o Leulua‘ialii ile aso na sosoo male aso na suesueina ai le tagi, e lei maua se avanoa o Kerita e faitau iai.
E na ole 20 minute na faataga ane e silasila iai a‘o lei kolosi Kerita i fesili ale loia ale itu ale ekalesia. Oloo faaalia i ia molimau tauto ni tuua‘iga e faapea sa faaaogā e Kerita ni tupe ale Matagaluega o Kuiniselani e totogi ai lana loia e aunoa mase faatagana.
Oloo teena malosi e Kerita nei tuua‘iga ona ole fonotaga ale faifeau ma aoao ma faletua ole matagaluega a Kuiniselani ile aso muamua o Iulai ole tausaga nei 2016, sa tuuina atu ai i luma tala ma faamaumauga o tupe. E leai ma se ta‘ua ai oni tupe na faaaogā e totogi ai lana loia.
Oloo faaalia foi i lea lava lipoti o tala o tupe ale matagaluega a Kuiniselani le sese ose faamatalaga ise tusi a Maiava Muliaga na lagolago ai le molimau tauto a Kerisiano Soti e faapea na faaaogā e Kerita ni tupe ale matagaluega e totogi ai lana loia. O nei tuua‘iga e pei ona faaalia ele faifeau ua faaleagaina ai lona tagata ma lona toalua ma lana fanau.
Faaalia e Kerita i lana molimau tauto ole fono ale aulotu EFKS i Ipswich ile Aso Sa, 3 o Iulai 2016, na tootuli ai Maiava Muliaga ma tagi ma faatoese atu ia te ia ma lona toalua ona o lona sese. Sa ia ta‘ua i lana faatoesega na faamalosia o ia e tusi le tusi na faapipii faatasi male molimau tauto a Kerisiano Soti ae sa ia lē ta‘ua poo ai na faamalosia o ia e fai le tusi.
Oloo tumau pea ona avea Maiava mase tasi o faifeau sinia ole aulotu a Ipswich. Ua faaalia e Kerita ole faaiuga na taunuu iai le faamasinoga ile suesueina o lana tagi ile aveesea o lona tofi toeaina male toeaina faatonu ole Matagaluega a Kuiniselani sa mamafa le faalagolago iai ole faamasino sili ile molimau a Kerisiano Soti ona ole tusi na tusia e Maiava Muliaga.
O mau uma nei ua finauina ai ele faifeau ma lana loia e tatau ai ona toe valaau atoa le mataupu lea sa suesueina ile masina o Fepuari ole tausaga nei, ma aumai ai le faaiuga ile masina o Me a‘o tauaofia le fono tele i Malua.
