Reunion Aiga Sapati & Faiane Futi o Faleū Manono

O lupe sa vao eseese a ua fuifui faatasi, a o le faamanatu a le faisalamo a Tavita, “se mea ina lelei o uso ae nonofo fealofani ma mafuta.” O le lagona lea na vaaia i totonu o le aiga potopoto o Sapati ma Faiane Futi i le faaiuga o le vaiaso ua mavae ina ua mafai ona faataunuu le faamoemoe o le aiga e pei ona masani ai i tausaga taitasi.

 
O le afiafi o le Aso Faraile aso 11 o Aperila, na faaulufale ai le mafutaga tuufaatasi a le aiga i le maota o le komuniti i Magele. Na auai uma ai sui o le aiga mai i Ausetalia Ueligitone faapea foi ma Aukilani nei. O le tofa ia Telea Tali ma Talifaaifo Salesa sa taulamua i le taitaiina o polokalame, faatasi ai ma le lagolago a lupe faalele a le aiga.

 
O faafeagaiga sa auai o le susuga ia Alona Futi, Faleu Futi, Tausa Futi ma le susuga ia Faasavalu Futi Salesa. E fā faletama sa mafai ona auai i lenei faamoemoe. O se mafutaga toatele ina ua tuufaatasi uma tamā ma tina faapea fanau. O lenei mafutaga o le faamanatuina lea o le lotu faamanatu a le aiga e pei ona masani ai i tausaga uma.

 
O le taeao o le Aso Toonai na amata ai le polokalame i le sauniga lotu na taitaia e le susuga i le faafeagaiga ia Arona Futi o se tasi o lupe faalele a le aiga o loo tausia le matagaluega a le PIC i Otahuhu. Na mae‘a le tapuaiga ona sosoo lea ma le ‘ava o le feiloaiga na saunia e alo ma fanau. Na saunia foi le malu taeao faapea taaloga a tamaiti i le aso atoa, a o le afiafi na faataunuu ai loa faafiafiaga a faletama taitasi.

 
Sa mataina tapenaga a itu uma o le aiga ae lē gata i lea o togiga sa saunia e vaega uma. O se tasi vaaiga tāua i lea po o taleni a alo ma fanau na faatinoina faapea foi faafiafiaga a tamā ma tina matutua sa malie ai polokalame. O le Aso Sa, o le aso mulimuli o le faamoemoe, na alafai uma le aiga i le faamauina o le anapogi auā le lelei ma le manuia o aiga. O le itula e 12 i le aoauli na tatalaina ai le anapogi ma fai ai le toonai fiafia ua faaiuina ma le manuia le faamoemoe na alo i ai le aiga potopoto.

 
Ua iai le manatu o suli o Futi o le a toe maua se isi mafutaga tuufaatasi i le tausaga fou i le taimi lava faapenei i le alofa o le Atua..