Pumoomoo le silafia o le Komesina o Leoleo i tulafono

 Le Komesina o leoleo, afioga Fuiavailili Egon Keil
Le Komesina o leoleo, afioga Fuiavailili Egon Keil

“Ua tatau ona toe iloilo aiaiga faaletulafono o le faaaogāina e leoleo o laau malosi i ni mataupu faafuasei”… Maiava Iulai Toma

O Aukuso o le tausaga ua mavae 2015 na faia ai se osofaiga a leoleo na auai ma le Komesina le afioga Fuiavailili Egon Keil, i le maketi i Fugalei. Na latou faaaogā ai ni laau malosi i se osofaiga poo se raid sa faia ai le poloka faatau a le susuga Suitupe ma lona faletua.

O lea gaioiga a leoleo ona o se suesuega i solitulafono tau laau ma fualaau faasāina. O le faatinoga o le osofaiga na mafua ai ona faatoai e Suitupe lana talosaga i le Komesina o Sulufaiga, le afioga Maiava Iulai Toma i lona lē fiafia i le auala na faatino ai le tiute o leoleo, ona na ia faamatala i tusitala ina ua tuanai lea gaioiga na matuā matata‘u ma fefefe ai nisi o loo fai poloka i le maketi ma tagata o le atunuu sa iai i le maketi i le taimi na faatino ai lea osofaiga.

Na faasiilima foi o ia e se tasi o leoleo ma faatonu e tuu ona lima i luga o lona ulu, ma faapea ona agai le isi leoleo ma saisai ona lima i uamea poo handcuff. Na ave o ia i le ofisa o leoleo i le aso o le osofaiga ma faia suesuega peitai na toe tatala ai lava i tua e lei lokaina pe faia ni moliaga ona e faapea ua iai se sasi o le gaioiga a leoleo i le sese o le tagata ua latou pueina ma osofai le nofoaga sa faia ai lana pisinisi i le maketi i Fugalei.

O le suesuega a le Komesina o Sulufaiga ma lona ofisa ua aliali ai le tele o fautuaga ua tuuina atu i le Matagaluega ma nisi o ofisa o le Malo e pei o le Loia Sili ma le Faatonu o le ofisa o loo nafa ma solitulafono le National Prosecution office.

Ua faaalia i se tasi o vaega o lea lipoti ua aliali mai i le mataupu na suesueina e pu moomoo le silafia o le Komesina o Leoleo i le faatinoga o le malosi o le tulafono pe a faatino se osofaiga a leoleo.

Ua faaalia foi ua vave ona faia le faaiuga a le Komesina na tapa ai se ioega a le Minisita o Leoleo e faaaogā laau malosi i le gaioiga ae e lei maua ni molimau maumaututu ma malosi e tatau ai ona faatino le latou galuega.

O se vaega lea ua fautuaina e le Komesina o Sulufaiga ua tatau ona toe iloilo le vaega o le tulafono o loo manaomia le ioega vave a le minisita mo se faatagana e faaaogā ai e leoleo laau malosi.

O le faaiuga a le Komesina e faaaupega leoleo na faia le gaioiga ua feteenai ma le faiga faavae e faaaogā ai se malosiaga ua sili atu, ma o se faaiuga na faia i se tulaga lē talafeagai (irresponsible).

O ni alii leoleo se toalua sa auai i le osofaiga ua fautuaina e le Komesina o Sulufaiga le ofisa o le National Prosecution ina ia suesueina mo ni moliaga o le tauto pepelo i luma o le suesuega na faia e le ofisa o le Komesina o Sulufaiga. Ua faamatalaina foi i le taunuuga o nei suesuega o le tulaga na tulai mai i le osofaiga a leoleo ua avea lea ma faatupu fefe i tagata ma ua aliali mai ai i fafo nisi faiga sa lē masani ona silasila i ai tagata lautele o le faaaogā tele o laau malosi i ni galuega a leoleo i nofoaga faitele e tumutumu i ai tagata.

O ni faiga foi ua aliali mai ai o ni gaioiga e masani ona faatino i ni galuega faapea i Amerika, ae o loo iai le ava fatafata ma tu ma aganuu faasamoa e masani ona toomaga i ai leoleo e faatoa malie ai ni mataupu e ono tuga ma ogaoga.