Pulupululima le nuu e totogi uma le aitalafu

Lupe faalele a Gataivai ma ana tamafanau ile mafutaga i Aukilani
Lupe faalele a Gataivai ma ana tamafanau ile mafutaga i Aukilani

Ile toe malaga mai o alo ma tamafanau ole afioaga o Gataivai oloo aumau i atunuu i fafo, ina ua mae’a aso fiafia sa malaga atu ai i Samoa e asiasi i aiga ma le nuu, na o mai ai ma le manaoga ole susuga ile faafeagaiga ia Rev Tuivanu Tuivanu, e fia susunu pepa ole loan ole hall ale nuu ile faaiuga ole tausaga.

O lea manaoga ua taoto mai ai ma se talosaga i tamafanau uma ole nuu oloo aumau i atunuu i fafo e alolofa atu e faamae’a le aitalafu oloo taoto nei ile faletupe e limaselau afe ma ona tupu tala. Mai i lea seleni oloo totoe nei, mai le 1.5miliona tala le aitalafu atoa ole hall sa fauina ile tausaga e 2012.

Ose galuega tele lea fale ma le faamoemoe ole susuga ile faafeagaiga ia Rev Amosa Tapuai sa iai i lea vaiataimi, ia faaaogā lea fale i mea e fai ale nuu aemaise o nisi o polokalame tetele ale autalavou. Peitai ane, ua lē mafai ona faaauauina le auaunaga ale susuga ile faafeagaiga ia Rev Amosa Tapuai i totonu ole nuu ma le ekalesia ona o nisi o tofiga ale ekalesai aoao ale Metotisi, lea na tofia ai loa le susuga ile faafeagaia ia Rev Tuivanu Tuivanu e tausiaina le ekalesia Metotisi i Gataivai seia oo mai lava ile taimi nei.

Ole amataina ole totogiina ole loan sa tagi lava i lima sailiga tupe ale nuu sa fai i totonu ole ekalesia, e ala i tausala sa fai i itu tino eseese ole ekalesia, e aofia ai le auso fealofani, autalavou ma le ekalesia atoa, ae sa lē tuua ai le fesoasoani a alo ma tamafanau ole afioaga oloo aumau i soo se atunuu i fafo.

Ina ua mae’a fesuiaiga ole aufaigaluega ale Atua ma seei mai le susuga ile faafeagaiga ia Rev Tuivanu Tuivanu ile tausiaina ole ekalesia i Gataivai, na lē toe faia ai loa ni tausala i ia vaega taitasi ae ua fai faaminime i faaiuga o Masina i matafale taitasi ole aulotu. O Gataivai ole isi lea nuu e tasi lava le lotu oloo iai, mai matafale e luaselau oloo galulue. Ole faiga fou lea na maitauina ai e aiga lolotu ma le afioaga ua televave ai ina maui atu i lalo le fuainumera ole loan sa iai.

Ole faaiuga ole tausaga 2012 na faaulufale ai le hall lenei ma amata ai loa ona galulue le ekalesia e togitogi le aitalafu. Ole tausaga e 2016 na valoaia ai ele susuga ile faafeagaiga ia Rev Tuivanu Tuivanu i totonu ole matagaluega i Gataivai e tatau ona oo mai ile faaiuga ole tausaga 2017 ua pa’ū maualalo mai ile limaselau afe le loan e tatau ona totoe, ma sa taunuu lava lea valoaga ile faaiuga ole tausaga.

Tusa ai ma le faatagisia ele tamā faifeau ma le matagaluega ole fesoasoani a alo ma tamafanau ole nuu oloo i fafo ile faamae’aina ole aitalafu, ua taufai galulue faatasi ai loa alo ma tamafanau ole nuu olo aumau i soo se atunuu ole lalolagi e saili seleni auā le faamoemoe ole ekalesia ile faaiuga ole tausaga.

Ua galulue Sini, Melepone, Brisbane, Amerika, Tutuila ma Niu Sila ile faamaopoopoina ose fesoasoani, ae ole lelei ma le maopoopo o nei mafutaga ona oloo taulamua ai lupe faalele ole afioaga oloo galulue i soo se fata faitaulaga.

Ile mafutaga i Aukilani e silia ile 40 aiga ua mafai ona auai ile mafutaga, ae oloo taulamua ai susuga i faafeagaiga ma o latou faletua.

Ole Isaraelu moni e susu’e lava lona faamalama ma tilotilo i lona faasinomaga ma lona tupuaga, ole ala foi lea ole galulue faatasi o alo ma tamafanau ole nuu oloo auamau i Aukilani.