Pulou le faifeau EFKS ma ifo i le aulotu

O le suegatupe a se ekalesia EFKS i se tasi o nuu o le itumalo o Faleata, na mafua ai ona tulai mai se eseesega i le va o le faifeau ma le aulotu.
O le molimau a se matai o lea nuu e faapea o le suegatupe na alu, na sao toga ai le ekalesia.
Ae ina ua faataunuu le faamoemoe i Niu Sila na gaoia ai ni Ie tetele se tolu. Na muamua foi mai le faifeau i le tapuaiga a le ekalesia ae nonofo ai pea nisi o le aulotu i Niu Sila mo le faatinoina o le faamoemoe na malaga ai.
Ae ina ua lauga le faifeau i se tasi o Aso Sa ua lata i taimi o aso fiafia, o le Kerisimasi na ia faailoa ai lona faanoanoa i le gaoia o Ie Tetele o le latou malaga.
Fai mai le molimau a le matai na talanoa ma le sui o le nusipepa e iai ma isi saunoaga a le faafeagaiga na momoli ai sona faagaulemalie i le faaletonu na tulai mai.
O ia lafoga a le faifeau na lē logo malie i le faafofoga a le aiga o loo tu ai le lotu ma faapea ona alu ai le sāvali a nisi o le au tino matutua o le aulotu i le toeaina o le pulega ma logo i ai lo latou lē fiafia ma ave loa i ai lo latou manao ua tatau ona tatala le feagaiga.
O le molimau a le matai e faapea o le sāvali lea na ave ai ma isi mataupu o loo lē fiafia ai le aulotu e pei o le liulotu o nisi o le ekalesia ona o le faifeau.
E lei manuia sailiga mo le fia maua o se finagalo o le faafeagaiga poo se isi o le aulotu, ae na taua e le molimau (matai) na fautuaina ai e le toeaina o le pulega le faifeau ina ia faatoese i le aulotu.
O le fautuaga lea na usitaia ma faapea ona faatino ai le sala pito maualalo i tu ma aganuu a Samoa pe a matuiā se agasala ua fai, o le pulou o le faifeau i le Ietoga ae Ifo i le aulotu.
O se gaioiga na taua e se isi molimau ua lē fiafia ai nisi o le lafu mamoe ma ua sa‘i ai ni o latou lagona i le matai sa‘o o le aiga.
O le a le faailoaina atu le nuu o iai lea aulotu ona o nisi o tulaga le maalofia.