O le lagona lea na faaalia e le taitaifono o le Komiti e pulea le Faletupe a le Pasefika i Saute, na mafua ai lava le manatu e faatau mai le faletupe o le Westpac o loo i Samoa auā le faatino ai o lana auaunaga.
O le faaiuga o le vaiaso na faatautaia ai se sauniga tele i le Malae o le Mataaga o Ropati Lui Sitivenisone i Vailima auā le tatala aloaia ai o le auaunaga fou lea ua sui i le Westpac i Samoa, le Bank of the South Pacific.
Ua lē gata la ina faatau e le BSP le Westpac, ae ua faapea foi ona tofia le uluai tamaitai Samoa ua puleaina nei se faletupe i le atunuu, o le tamaitai lea o Maryanne Lameko Vaai. O se tamaitai sa iai i le pulega a le Westpac i le taimi na faatau atu ai lenei faletupe i le BSP.
O le faletupe aupito telē lea i atunuu o le Pasefika e pei ona iai lona ofisa tutotonu i Papua Niu Kini, ma ona lala ia ua tatala nei i Fiti, Atu Kuki, Tonga ma Samoa ma o loo iai ma le fuafuaga e tatala isi lala i Vanuatu ma le Atu Solomona.
O le tausaga na tea nei lea na faalauiloa ai le agai o lenei faletupe a Papua Niu Kini e faatau lala nei o le Westpac i vaega eseese o le Pasefika ma na ta‘ua e le taitaifono o le BSP o le iai o se isi atinae tele i Samoa na faigofie ai lava le faaiuga e aumai ma le faletupe o loo faapea ona pulea e lea atunuu i totonu o Samoa.
O le isi atinae o loo galulue ai le Taitaifono ia Kostos Constantino ma nisi o aufaipisinisi mai i Papua Niu Kini o le faletalimalo o Taumeasina i le motu i Moataa ma o se galuega tele na faaalia e le alii Palemia o lea faatoa maua se kamupani ua mafai ona faatino lea galuega.
O le tausaga fou e tatau ona mae‘a ai ae o lea ua iai ma le faletupe tele lenei e lua ai pisinisi tetele ua aumai mai i Papua Niu Kini i totonu o Samoa.
Faaalia e le taitaifono o le BSP e tele suesuega na faia ma o le vaavaai i le tulaga saogalemu o Samoa, o le alualu pea i luma o ana atinae ma lona tamaoaiga o lea na manatu ai e talafeagai lenei laasaga fou i le itu tau i atinae. O le tulai mai o lenei tofiga maualuga ua umia e se alo tamaitai o Samoa, o se fiafiaga tele foi lea mo le malo o Samoa ma ona atinae.
Faaalia e le alii Palemia o le tele ia o tausaga o taumafai e unai se suiga faapea i le pulega a le ANZ, e pulea e se tamaitai Samoa, ae o lea faatoa mafai ona maua i le faletupe fou lenei O le lu‘i foi lea a le Palemia i le ANZ atonu e oo atu i le tausaga fou ua mafai ona faamatuu i se tagatānuu o Samoa, aemaise se tamaitai le pulega o lea foi faletupe i ona lala i Samoa nei.
O le lu‘i mo le faletupe fou na tuu atu e le alii Palemia ona o Constantino o ia foi lea o le taitaifono o le kamupani vaalele o le Air Niugini ma ua talosaga sa‘o lava le Palemia o Samoa mo se vaalele e fealuai i le va o Samoa, Hawaii, Hong Kong ma Papua Niu Kini.
Ta‘ua e le susuga Tuilaepa Lupesoliai Sailele Malielegaoi, a iai se vaalele faapea, e lē gata o le a tumu ai le Taumeasina ae o le a unai ai foi femalagaaiga i le va o Papua Niu Kini atoa ai ma Samoa nei.
O le BSP e to‘a 4,000 (fā afe) le aofai o ona tagata faigaluega ma o tagata uma lava sa galulue mo le faletupe o le Westpac o loo galulue uma nei i lalo o le faletupe fou, ma na ta‘ua e le taitaifono o le faletupe fou e tuu atu le ono masina e galulue ai le BSP ma faamautu ana galuega i Samoa ona silasila loa lea o le atunuu i fesoasoani e mafai ona ofo mai i totonu lava o Samoa.
