Ua 91 tausaga o le Kolisi o Avele ae o lea faatoa mafai ona aveese le pulega o le faatautaiga o le aoga mai i le vaavaaiga aoao a le Malo. O se tasi o kolisi aupito umi i totonu o Samoa ae o le aoga muamua foi lea ua mafai ona see ese faapea mai i le lio lea o aoga a le malo ma lo latou faatautaiga.
O se sauniga na faatautaia i le laumua o le kolisi i le faaiuga o le vaiaso na tea nei, lea na faamautu ai loa lenei suiga.
O loo i lalo lava o le faamalumaluga a le Malo le Kolisi lenei i Vailima ae o le eseesega mai i isi aoga a le Malo, o faaiuga fai i le faatinoga o ana galuega ma le faatamoega o le aoga ua lafo sa‘o lava i le komiti o le aoga e aofia ai sui o Mātua ma Faiaoga faapea sui o tama ma teine tuai o le Kolisi a Avele.
O se faiga ua leva ona vaavaai i ai le Kolisi ona o le tele o isi faaiuga ua manatu le kolisi e faigofie lava le sau sa‘o i le Komiti a le aoga e lē tau agai ai fua i le ofisa o aoga i lona faatinoga ma e laitiiti ai le taimi e tau faatali ai i iuga fai mo galuega fia faatino vave a le aoga.
Mo Aoga i Niu Sila ma isi atunuu i fafo, o le faiga lenei o loo molimauina ai. E iai lava le Komiti lea e ta‘ua o le Board of Trustees poo latou ua iai le faamalumaluga o aoga ina ia faatino ai galuega fia faaleleia o aoga.
E na o le pau lea o le aoga a le Malo ua faatautaia ai lenei faiga ma atonu o se auala foi lea e ono agai i ai isi aoga i totonu o le atunuu.
O le alii Palemia, le susuga Tuilaepa Lupesoliai Sailele Malielegaoi lea na auai atu i lenei suiga fou ma na ia toe faamanatu ai i le kolisi le tāua o le sao o Avele i le itu tau i le atinae o le ola o fanau a le atunuu. Ua ia faamanatu le tele foi o faafitauli sa tulai mai i lenei aoga ae ua vaaia le tele o suiga lelei ua faapea foi ona sau mai i Avele.
O le lagolago a le malo na ia faaalia ai o le ā lava nisi auala e toe agai atu ai le Kolisi mo se fesoasoani ma le lagolago a le Malo o loo iai lava le faamalumaluga lea. O faiaoga uma foi o le Kolisi o loo totogi lava e le Malo ae o faaiuga fai i galuega fia faaleleia a le aoga o loo ua lafo atu nei i le komiti lea o faiaoga, mātua ma sui tuai o le Kolisi.
O le Kolisi lenei na faavae mai o se aoga tau faatoaga ma na tatala ai i alii mai i atumotu o le Pasefika. Na suia ina ua avea ma kolisi a le Malo ma e na o alii lava. O le tausaga nei e atoa i ai le 25 o tausaga talu ona talia tamaitai i le Kolisi o Avele lea e faaauau ai lava e oo mai i le taimi nei.
Sa faafetai le aoga i le taitaiga a le Malo i le Kolisi i le tele o nei tausaga ua mavae ma le faamoemoe o le a lē tamomo‘e i se taimi lata mai le aoga mo se fesoasoani ona o lea ua tuu uma le faatuatuaga a le aoga i lana Komiti lenei mo le mautinoa e faaauau le atinae o Avele pe o le a lelei atu foi nai i lo le faiga sa sau ai.
