Pulea ele SCOPA le Kolisi o Samoa

O fanau oloo aoaoina ile Kolisi o Samoa
O fanau oloo aoaoina ile Kolisi o Samoa

Ua 64 tausaga talu ona faavae le Kolisi o Samoa ose isi kolisi maualuga ale Malo, lea na amatalia ile tausaga e 1953 ile taimi o pulega ale Malo o Niu Sila i Samoa. Ose kolisi sa ave uma iai fanau popoto ale atunuu i tausaga uma ona sa faafailele ai taitai ole atunuu e feagai ma galuega ole Malo.

E lei leva tele tausaga talu ona lē toe faia le tulaga sa iai muamua ole fili mai o fanau e maualuga le tomai mai aoga tulagalua ale Malo ona ave lea ile Kolisi o Samoa. O lea ua lē toe faia lena faiga ae ua o uma lava fanau popoto a aoga tulagalua a nuu i Kolisi maualuluga a itumalo poo nisi kolisi e latalata ane i aiga o fanau.

Peitai e le o taofia ai le aumai lava o fanau lelei ma popoto e o latou mātua e faaulu ile Kolisi o Samoa. O lea la ua uu nei ele sosaiete o tama ma teine tuai ole Kolisi poo le SCOPA le pulega ole aoga, ole a tulimatai ai nei poo ā nisi suiga silisili ona lelei ole a faatino ele SCOPA mo fanau oloo aoaoina ile Kolisi.

Ole miti lea ale SCOPA ua taunuu ina ua aloaia le tuuina atu iai ole pulega ole kolisi ile faaiuga ole masina na tea nei o Me, le Aso Lulu ole vaiaso ua mavae 31 o Me 2017. Faaalia ele Pelesetene ole SCOPA le tofa Lealailepule Rimoni Aiafi, sa talanoaina ele sosaiete le fuafuaga ale Malo e ave i tua le pulea o aoga maualuluga ae sa iai sui ole SCOPA na latou faaalia e le mafaia ele sosaiete ona fai lea galuega. Sa latou faaalia foi e pei ona faamatala le Pelesetene, e leai se tupe mamā poo se polofiti ale SCOPA e maua ai.

Peitai ole talitonuga o Lealailepule ole faagaioia ose aoga e le saili ai ni tupe mamā ae saili ai auala lelei ma silisili e aoaoina ai fanau ina ia popoto ma atamamai. Ua iai nei se komiti ale SCOPA ua iai i totonu nisi o lauia ole sosaiete e aofia ai le Pelesetene ma le Minisita o Fesootaiga le afioga Afamasaga Rico Tupai, ole a nafa ma galuega ole pulea ole Kolisi o Samoa.

E lei faailoaina se auivi o fuafuaga ua ioe iai le sosaiete e amata ai le latou pulega ma e iai le talitonuga e faailoa ise taimi e le o toe mamao. Ole pulea ele SCOPA ole aoga ole a faatumau ai pea le igoa ole Kolisi o Samoa, ma ole a iai pea ma le faamalumaluga ale Malo e ala mai ile Matagaluega o Aoga Taaloga ma Aganuu.

O lona uiga o meaaoga mo le fanau ole a maua pea mai le Malo faapea ma le totogiina o faiaoga.

Ole faiga foi lea ua pulea ai le Kolisi o Avele lea na muamua faatino ai lenei fuafuaga ale Malo ini tausaga ua tuanai.