Puipui le mamalu ole sosaiete a tusitala faasee tuagalu le Peresetene

Ole tofa Apulu Lance Polu (ogatotonu), ua togi lana solo ma le tofiga Peresetene ole faalapotopotoga o tusitala ma le aufaasalalau a Samoa, ona ose moliaga solitulafono ua taoto nei ile Faamasinoga Maualuga
Ole tofa Apulu Lance Polu (ogatotonu), ua togi lana solo ma le tofiga Peresetene ole faalapotopotoga o tusitala ma le aufaasalalau a Samoa, ona ose moliaga solitulafono ua taoto nei ile Faamasinoga Maualuga

Ole amataga ole vaiaso nei ile Aso Gafua 18 o Setema 2017 na tutulai ai ile faamasinoga maualuga faatonu e toatolu ole kamupani nonu ole Local Partners and Associate e tali i moliaga solitulafono ua molia ai e leoleo.

O i latou e toatolu e aofia ai lē sa avea ma Minisita o Faatoaga ma Faigafaiva susuga Laaulialemalietoa Leuatea Polataivao Fosi Schmidt, ole tofa Apulu Lance Polu ma le susuga Martin Schwalger. Ole isi e toafā ai i latou ua molia ole faletua ole susuga Laauli.

Ole tau faaiuiuga o Aokuso na aumai ai le faamavaega ale susuga Laauli Leuatea Polataivao ile tofi Minisita ole Kapeneta e mafua ile puipuia ole Mamalu ole Malo ma le vaega faaupufai ole HRPP oloo avea ai ma sui.

E lei tuanai lea faamavaega ae feiloai le tofa Apulu Lance Polu ma le sui Peresetene ole faalapotopotoga o tusitala ma le aufaasalalau a Samoa le JAWS ma logo iai o ia foi ole a faasee tuagalu ma le tofi Peresetene ole Faalapotopotoga. Ole aso 11 o Setema 2017 le Aso Gafua ua mavae na tuuina atu ai le tusi faamavae a Apulu ile sui Peresetene ma le komiti faafoe ole JAWS.

Faaalia e Apulu i lana faamavaega tusitusia, ole puipuia ole tulaga tutoatasi ma le mamalu ole faalapotopotoga ua faia ai lana faaiuga e tuua le tofiga na tofia iai ele sosaiete ile tausaga ua mavae ile masina o Iulai.

O Apulu ose tasi o tusitala sinia ua leva tausaga o galue ile galuega lea na amata mai ile leitio ole 2AP, sosoo ai ma le faia o lana lava pisinisi o faasalalauga ole nusipepa, mekasini, ae o lea ua iai nei lana leitio faasalalau ole Samoa FM faapea lana tautua o tala fou i luga o lana upega tafailagi ole Talamua online.

Oloo molia lea tamalii poo se faatonu ole kamupani nonu ole Local Partners and Associates i Vaitele ile moliaga ole faia ose faamaumauga sese. O Laauli oloo molia ma lona faletua ile moliaga ole maua oni tupe mai se faiga poo se gaioiga e solitulafono.

  O Martin Schwalger e le o maua tonu le moliaga oloo molia ai. Ole tagi na faaulu i leoleo e se isi faatonu ole kamupani nonu le afioga Peseta Vaifou Tevaga, ua mafua ai moliaga. O tuua’iga ole faaaogāina o tupe ma le pulea o aseta ale kamupani e mafua ai moliaga a leoleo.

E tuuina atu lenei lipoti mo le faasalalauina e lei maua le tulaga na taunuu iai le valaauga muamua o moliaga oi latou e toafā mai taualumaga ale faamasinoga maualuga ole Aso Gafua o lenei vaiaso ae ole a tuliloa mo le isi lomiga o sosoo ai ale Samoa Times.