Ole valu o tausaga ole tamaitai o Lilly na faatoa mafai ai ona pua’i atu mea matagā sa nofo ma ia ile tusa faatoa lima tausaga lona matua.
Oloo i Samoa ile taimi nei le aumalaga e toafa, o tamaitai mai Ausetalia, e aofia ai ma le Afioga a Lyllian. Ole latou asiasiga ile Campus of Hope i Tuanaimato ile Aso Sa na tea nei, na faamalieina ai se tasi o vaega o miti a lenei alo o Samoa, (Lyllian) ua silia ma le 20 tausaga talu ona nofo ma ia ina ua manuia ma sologa lelei lona olaga tuputupu a’e i atunuu i fafo pei o Ausetalia. Ua uma aso ole pogisa, sa lē iloa ai e Lyllian poo le ā tonu lava le mea e fai. I lana faamatalaga, ua 32 ai nei tusaga o lona olaga, ae ua amata ona auauai mai ele Atua ana folafolaga mo ia. E soo se tagata soifua lava e iai fuafuaga ale Atua na fanau mai ma ia. E oo foi i lona tagata ile taimi nei.
Ae i lana tautinoga na faamatala i luma o fanau ua manumalo mai sauaga a Samoa, ile Campus of Hope, na maitauina ai le to’a ole tamaitai ile faasoaina o sauaga na feagai ma ia a’o faatoa lima tausaga o lona matua.
A’o laititi sa ia lē iloa pe ose mea leaga lena mea sa faia e lona tausoga tama, e matua atu ia te ia i lena taimi.
O lona tausoga lea sa tele ina nofo ile latou fale, e faia feau a ona mātua ma saofia ai ona tupu pea lava pea lea amio matagā ia laua.
Ua oo ile taimi sa o ai i Niu Sila ma ona mātua, ma toe foi mai i Samoa. Ae pe ole valu o ona tausaga i lena taimi na toe taumafai ai foi lona tusoga tama lea e popō ia ile potu. Ae ole taimi lea ua ese ona lagona. Ua fefe ma ita i mea ia e fai atu e lona tausoga ia te ia. Ma nate lei tuuina iai se avanoa i lea aso, ae oso mai i fafo ma le potu peitai na fetaui ma le iloa atu o ia ele tagata o lona aiga, i ona foliga lē mautonu ma le ita tele.
Mitamitaga o aiga ua afaina
Na fai le talanoaga faapumoomoo a lona aiga i lea aso, O iina na faamasino ai loa ia ma ona ta’uina ai loa le mea leaga lenei ua leva ona tupu ia laua ma lona tausoga. Ina ua ia manatu ane e le ose mea lelei le amio lea sa faatino atu ele alii lea ia te ia, ma sa tupu ai pea lona ita tele. Ole iuga ole talanoaga ia tanu ifo ai lava iina le mea na tupu ia te ia. Ae sa matuā fasi tigaina e lona grandfather le alii lea ole latou aiga.
Ma le faamatalaga a lona aiga ia te ia, ia gata ai lava i lena aso, aua ne’i faailoaina i nisi. “E leai ma se tasi ole matou aiga na fesili mai pe o faapefea mai o’u lagona.” Leai ma se isi o iai se malamalama pe fia iloa foi ni aafiaga o Lyllian mai lea faaletonu ua tupu ai. Ua uma lava le talanoaga na fai ma tanu ifo ai lava, ae ua matuā faasā ia ona talanoa ai ise isi lava tagata.
Sa ia tagi atu ile Atua, e fesoasoani, ma ia maua ai le mapusaga ole filemu i lona loto. E manatua lava e Lyllian le moni tele o fautuaga a lona grandmother, e toaga e tatalo ma mafuta atu ile Atua, o lona fesoasoani sili lea.
Ua ia toe momoo i fesoasoani e tele ua maua i aso nei, mo fanau sauaina i totonu o aiga, e pei ona sa tupu ia te ia. Faatusa i tausaga e tele ua tuanai sa tanu ifo lava le amio leaga ma le matagā e tutupu i totonu o lotoifale o aiga, faapei ona tupu ia Lyllian ile 30 tausaga talu ai.
Oloo iai pea pine faamau ole tatou faa-Samoa o aso la ma aso nei, i aiga, ole tausoga lava e tele ina ta’u e isi ole tuafafine ma le tuagane, aemaise aiga e leai ni tama poo ni teine a isi fanau ona faatuagane ma faatuafafine ai lea i fanau a uso ole tamā poo le tina foi, lea ua ta’ua o taseni (cousins).
Faia ele Atua mea silisili mo Lyllian
E tofu lava le tagata ma le miti, faapei ona ia moomoo ia avea o ia ma tagata pese, ose tagata e faia ata faatino, koneseti ma ia faapei ose tagata fai ata tifaga ma feiloai atu i tagata oloo faatinoina ata tifaga.
O na moomooga uma ole tamaitai ua amata ona ia maua na faamanuiaga uma.
Ole isi lea mafuaaga ole malaga mai i Samoa, ina ia tapena atu le lotoifale o lona siosiomaga i Samoa, mo le koneseti tele oloo galulue ai nei ma lana aumalaga lea mai Ausetalia.
Ole masina o Ianuari ole tausaga fou, oloo fuafua e faaali ai i Samoa le ata faatino e faatatau tonu lava i lona olaga.
