Priscilla Paleagaese Olano – Miss Samoa 2016-2017

Le tamaitai o Priscilla Olano ua avea nei ma tausala o Samoa mole 2016 - 2017 - Photo: Alexia Rae
Le tamaitai o Priscilla Olano ua avea nei ma tausala o Samoa mole 2016 – 2017 – Photo: Alexia Rae

Ole tamaitai ua 25 nei ona tausaga mai le afioaga o Laulii, ae iai foi lona pito Initia, Rotuma ma lona pito Amerika, na faapale ele Miss Samoa ole tausaga talu ai, Ariana Taufao. Na mataina le tauvaga i lea afiafi na faia ile fale taalo ole malo i Tuanaimato, e lē gata ole telē ole lagolago mai aiga, ae o pisinisi ma kamupani.

Ole isi itu mataina ina ua sui foi le faalapotopotoga na latou tapena ma talimalo, e suia ai le Manaia Event sa masani ona latou faafoeina lea vaega ole Teuila. O metotia ma tomai mai alii ma tamaitai aoga ole vasega ole 1981. Ua faaigoa ole SEI, Samoa Event Incorporated.

Ile faamatalaga ale susuga Nanai Lave Tuiletufuga, ua fai ma sooupu ale SEI: na faavae mai tamaiti na amata aoga faatasi mai le Apia Infant, Apia Primary, Leifiifi, ma ta‘ape loa aooga isi ile Samoa College, St Mary, St Joseph, Vaipouli ma Avele, ae toe faauu faatasi uma lava ile 1981.

“Sa fai le matou iuni ile tausaga nei, ae faasalalau atu loa ele malo le sailia ose isi e Host ile Miss Samoa Pageant. Fai loa le matou peti ile matou kamupani fou ole SEI.” E tolu tausaga lea ua faamatuu atu ile SEI e latou te talimalo ai ile Miss Samoa. Ua latou maua foi le avanoa e tapena ai ile Tausala ole Pasefika lea e faia mai i Apia ile masina fou, e saili ai se isi e sui ile tausala mai Papua oloo pale mai.

Ua faamauina foi, ole faatamoega lava ia ole Miss Pasefika, o tiute lava na ole pulega Tulisi, faapei foi ona latou fili ai tamaitai tausala ole Tauvaga Miss Samoa na se‘i mavae atu nei. E tele ni vaega ole Tauvaga Tausala na mavae atu na fia fesiligia ai le pulega o tapenaga, peitai e lei mafai ona maua mai se atoaga ona o isi vaega sa nafa ma faamasino.

O ia itu e aofia ai le mafuaaga ole lua o tamaitai tauva mai Ausetalia. Ole tala taumate ale tasi o paaga ale tusitala mai le pulega o Tulisi e faapea, o Ausetalia ose atunuu telē tele, ua talafeagai ai lava le lua o latou teine, ona ole vavamamao.

Peitai na ta‘ua ele pulega o tapenaga ole Miss Samoa, o tulafono e faavae i lalo o tulafono ale pulega o Tulisi, STA, e lē mafai e latou ona suia, o faaiuga oloo sosolo lava ile faavae ole Miss Samoa Pageant.

Ole isi tulaga na fesiligia i lea po ole tamaitai na tulaga lua, ona ole mataina foi o lona maua o lea tulaga, e ui ina molimauina le tulaga na iai e leai ma se special award na maua e lea tamaitai peitai na lau mai le faaiuga e tulaga lua poo le first runner up. O ta‘ua ele paaga, ole faaiuga lena na fai e faamasino ole po e pei ona maitauina. Peitai na saunoa Nanai, ose po na iloa ai le galulue faatasi o aiga, uo, pisinisi ma kamupani ae ole lagolago ale lautele ua manuia ai taualumaga uma e pei ona iai.

E oo lava i teuga ma laei Samoa, i o latou foliga uiga eseese, na maitauina foi le taumate ole tamaitai e manumalo ona ole fou o ia foi foliga ua su‘i ma fua agai iai le laei Samoa.

Le tamaitai o Priscilla Olano male vaega ale Love Lani sa lagolagoina o ia ao faagasolo le tauvaga - Photo: Alexia Rae
Le tamaitai o Priscilla Olano male vaega ale Love Lani sa lagolagoina o ia ao faagasolo le tauvaga – Photo: Alexia Rae

Ile aotelega o lenei faamoemoe ile afiafi, na matagofie uma lava tamaitai uma. I tapuaiga lava ia a aiga male atunuu, e talitonu, ole tagata lava ete masani ma e tau iai, o tagata foi lena sa e tapuai e malo. Peitai, ole faiva ole filifiliga na viia ai foi le galuega fita na feagai ai ma faamasino ole po. Ole tausala fou lenei a Samoa ole a tauaveina lenei tofiga mole isi 12 masina. Ose tauvaga e lei faigofie e pei ona matauina tapenaga sa faaalia e tamaitai uma e toavalu.

E fā vaega togia sa tapena uma iai tamaitai i lenei faamoemoe, ole laei taele lea na manumalo ai le tamaitai tausala o Niu Sa Uelese. Ole laei faaleaganuu na manumalo ai le tamaitai ia Abba Rose ole Sharon Dina Ioasa.

Ole taleni, taliga fesili male tamaitai ata lelei na sola male tamaitai ua pale nei ile tausala o Samoa, Pricilla Olano. Ole tamaitai tausaafia ona uiga na manumalo ai le tamaitai ia Easter Timoteo.

Ole aotelega ole tauvaga na tulai mai ai le tamaitai ia Tayla Scanlan le tausala o Niu Sa Uelese ile tulaga lima. Ole tulaga fā ole tausala o Samoa i Niu Sila Naomi Eta Fruean. Ole tulaga tolu ole tausala na lagolagoina ele Lila’s Flora Dinah Vaiaoga.

Ole tulaga lua ole tamaitai ia Miriama Meafou, ole tausala o Ausetalia. Ae ole tulaga muamua poo le manumalo ole tamaitai ia Priscilla Olano. Ole a tapena le tausala fou o Samoa mole sailiga ose tausala ole Pasefika lea ole a talimalo ai Samoa ile masina o Novema. Ole tausaga lenei e atoa iai le 30 tausaga talu ona faavae lea faamoemoe.